2020-06-26 14:07 來源：澎湃新聞·澎湃號·湃客
原創 沈嘉祿 海上夢疊
作者：沈嘉祿
滬語改寫：周紅纓
文字修正：丁迪蒙
誦讀：孫蕾
現在有交關江南個古鎮儕有粽子賣，青浦朱家角個鹹蛋黃肉粽伊拉個拳頭產品，沿街設攤、叫賣個起碼有三四十家。肉粽裡加慄子也是勿錯個創意。北大街有個姓葛個老太，出品個肉粽最好。
新場古鎮也有家粽子出品勿錯，大肉粽賣得比其他地方便宜，迭兩年是否漲價勿曉得。印象當中，伊拉個五花肉連皮帶肉，肥瘦相兼，老大一塊塞勒米裡向，稻草繩扎得緊，現燒現賣。
新場古鎮
金山楓涇三橋景區有家清風閣茶樓，但伊名聲在外個是店裡供應個阿興粽子。茶樓主人叫潘興，開茶樓是本行，但是為了擴大生意，就賣粽子了。阿興比同行做得好，選用楓涇豬肉，加大分量，實實足足兩大塊，估計有二兩重——師傅勒街面浪包粽子大家儕看得見個，好吃。阿興還推出排骨粽、鹹蛋黃肉粽咾啥，拌料相當講究，醬油搭糖、黃酒儕有比例，迭個是秘方，勿可外洩個。然後，大鑊子燒三個鐘頭，火候控制邪氣得法，解開粽箬，香氣撲鼻，一口咬下去，鮮香適口，肥而勿膩，勿柴勿梗。糯米吸收了豬肉個滷汁搭粽箬個清香，每一粒儕像珍珠一樣個透明，儕有甘甜個回味。消費者心裡有桿秤，稱阿興為「粽子大王」。生意好個辰光，每日天要買脫一萬隻。
不過，讓人擔憂個是，勿少商家推出啥個鮑魚粽、魚翅粽、乾貝粽等等，一隻要賣一百多，包裝也邪氣豪華，真箇是搭月餅有得一拼了。前幾日朋友送撥我一盒某名牌酒樓個豪華版粽子，加熱以後剝開來，爛撲撲個勿成形，所謂叉燒、乾貝、儕沒應該有個味道，迭能個閒話，還勿如老老實實做好大肉粽算了。聽講，現在有眼飯店拿粽子外包出去，讓弄堂裡老太做，貼牌生產，質量監督又跟勿上，趁勒興頭浪向一下子推出來，搶鈔票要緊啊！迭能個粽子勒價鈿搭感情浪離百姓就越來越遠了。
搿幾年，上海流行私房菜，葛末私房個月餅、八寶飯、湯糰、年糕、粽子咾啥也就應運而生。我吃過個私房粽也蠻多，味道儕勿錯，有辰光還會得出花樣精，引入和牛、澳龍、金蠔、黑松露、牛肝菌、西班牙火腿等食材，真箇是百花齊放，百家爭鳴。捨得投入，勿計成本，競爭力也許就會增強。
有一位黃姐，退休勒屋裡修養生息，每年端午前頭會包點粽子撥朋友分享。伊個粽子有講究，糯米是安徽吳祥個，肉是浙東農村散養個，粽箬從福建採購來，煠了以後仍舊碧綠生青。更加講究個是五花肉切小塊，事先用老抽醃兩日兩夜，再加糖拌透，一隻粽子塞進五六塊肉，足足有100克，保證每口儕吃到肉，是肥瘦兼顧個肉，口感當然好咾！伊個粽子免費送朋友，大家吃了儕講好，幾番推讓之後收了成本費。後來有勿少飯店聽講，問伊訂貨，伊忙勿過來，只好請鄰居阿姨幫忙，屋裡開小作坊了。飯店包粽子講速度，據講最快個一分鐘要包十幾隻，伊關照阿姨：慢點慢點！一分鐘只好包五六隻，慢工出細活是有道理個。幾年運作下來，黃姐成為上海灘有名個粽子大戶。端午期間，一天產量突破5000隻，一出鍋就賣光！除脫本地客，還有專門從北京、廣州來個吃客唻，連住勒古北小區個老外也來買伊個粽子，還有小日本乘飛機來買，當天就迴轉去。
還有位資深美女邢偉英，大家叫伊邢姐，十年前頭勒蘇州東山陸巷買了一幢明代「山中宰相」王鏊個故居會老堂，經過好幾年修舊如舊，精心修繕，成為一家邪氣有特色個民宿。阮儀山稱伊是：「古建築當中修復得非常好個一例。」
每年端午節，邢姐要大張旗鼓個包趟粽子。淘米浸泡、清洗箬葉、五花肉上色調味等常規程序之外，伊還要老有儀式感個著件藍印花布鑲棗紅色滾條個旗袍。包粽子個地方就勒會老堂個迴廊下頭，聽聽鳥鳴，感覺樹影個移動，迭能個操作簡直就是享受呀。粽子熟了就趁熱送到親朋好友屋裡，我拿到以後一摸，還是熱個！
舊年端午，邢姐包好粽子，突然之間想起來要為伊個粽子取個容易流傳個名字。微信發撥我，我馬上回覆：就叫「會老堂四大才子粽」伐。
為啥拿四大才子牽聯進來？喏，會老堂嘛，第一任主人王鏊勿就是唐伯虎、祝枝山幾位個老師嘛？老師勒搿搭隱居，學生再牛，也必須常莊來此地請安問學。假使剛巧碰著端午，大家勒一道吃只粽子，吃杯雄黃酒，吟誦幾段端午詩文，也是情理之中個美事呀。所以四大才子粽還是有得出處個，再講呢，「四大才子」搭上海閒話裡「四大饞主」個讀音是一樣個。經常撥百姓充當笑料個唐、祝、文、周，既是風流才子，也應該是膾不厭細，食不厭精個饞主呀！
邢姐一聽馬上拍手稱好。勿出一禮拜，四大才子粽果然新鮮出爐：肉粽、鹹蛋黃粽、蜜棗板慄粽、白米赤豆粽，裝勒竹絲提籃裡，上頭貼張白描，四大才子活龍活現。紅黃絲線，粽箬碧綠，只只飽滿紮實，剝開來一吃，真箇是姑蘇風味，濃濃人情！
作者：沈嘉祿
朗讀者：孫蕾
原標題：《端午粽，都市裡的美麗風景（下）》
閱讀原文
關鍵詞 >> 端午粽
特別聲明
本文為澎湃號作者或機構在澎湃新聞上傳並發布，僅代表該作者或機構觀點，不代表澎湃新聞的觀點或立場，澎湃新聞僅提供信息發布平臺。申請澎湃號請用電腦訪問http://renzheng.thepaper.cn。