老早仔，一到西北風辣弄堂裡竄來竄去個辰光，下半天三四點鐘，鳳陽路上，迭只弄堂口一隻油墩子攤頭就擺出來了。迭條弄堂蠻闊，朝南，走過幾排石庫門房子，可以穿到南京西路；朝北，穿出一片石庫門房子，就是北京西路。弄堂一頭是只幼兒園，一頭是南京路上海電視臺，還有一條賣牛仔褲個青海路。所以，人來人往，邪氣鬧猛。
炸油墩子個，阿婆多一眼，家什裝備儕差勿多，一隻小矮凳，一隻煤球爐，一隻鐵鑊子，跟普通屋裡用個勿一樣個，迭只鐵鑊子上多一隻鐵絲網架子，瀝油個。腳跟頭就是一面盆蘿蔔絲搭仔一面盆調得薄溏溏個麵糊。
有一隻長柄個勺子，勺子是白鐵皮做個，橢圓形，底比口稍許小一眼，大約模兩三釐米深。做個辰光，先舀一勺子麵糊進去，襯底；再松松交堆一層蘿蔔絲辣上頭，再淋一勺子麵糊上去，封牢，連勺子一道擺進油鑊子裡炸。柄上端有彎頭，可以鉤辣鐵鑊子沿口，然後，阿婆可以騰出手來做下頭一隻。等油墩子表面炸成金黃色，鐵勺子一翻，油墩子從勺子裡落到油裡再炸，用筷子辣油鑊子裡翻一歇，看上去脆了，就搛到鐵絲網浪向瀝油，也是冷一冷，否則，就算用紙頭墊好，也根本嘸沒辦法捏上去。
長遠嘸沒吃了，有點牽記。前兩天，到七寶老街去白相個辰光，就碰著一隻油墩子攤頭，5塊洋鈿一隻，比從前貴交關。問伊，阿好等一隻剛剛從油鑊子裡拎出來個？小姑娘虎起仔面孔，講，儕是剛炸出來個，一邊從鐵絲網架子浪個油墩子裡搛仔一隻。
手捏上去是勿大燙了，咬一口，倒是熱烘烘，正好，味道也正正好，是從前個樣子。想想，小姑娘脾氣是大著一眼，做生活倒是勿推板。（沈一珠）