白話廣州
前段時間同一班親戚去唱K，幾個小朋友做咗「咪霸」。年紀稍大嘅唱情歌，細小小嘅就唱《小蘋果》。問一班小朋友：「你哋唱唔唱兒歌啊？」個個都撒手兼擰頭：「唔識唱喔。」
唔識唱系假嘅，《月光光》、《落雨大》、《何家公雞何家猜》呢啲熱門粵語童謠，應該點都識得哼兩句。但系，一班小朋友就冇乜興致。若然你再問佢哋識唔識唱《賣懶歌》、《大笨象揸支槍》呢啲「冷門」童謠，睇怕就更加冷場喇。
莫講依家嘅小朋友，我諗佢哋嘅阿爸阿媽都可能未必識唱粵語童謠。有人話依家嘅幼兒園唔注重廣府文化教育，但唱兒歌呢樣嘢就真系同「家庭教育」有關。好似嗰首《落雨大》，佢嘅作者同創作時間都已經不可考究。有人從音符同語言推測，呢首歌應該系清末民初西關地區街頭巷尾流傳嘅口水歌。點解嗰個時候嘅童謠可以一直傳到依家都仲有人識唱？靠嘅就系「家庭教育」——阿媽識唱，細路就識唱，幾代人就咁樣傳唱落來。
依家老城區部分學校開始注重地方文化特色教育，有啲小學同幼兒園已經開設童謠、粵劇之類嘅興趣班。前幾日嘅嶺南童謠大賽，荔灣上下九路幼兒園就憑一首原創童謠攞咗個人氣獎。希望呢首出自西關嘅原創作品，可以好似《落雨大》咁樣全城傳唱啦。
李月婷 媒體人
(原標題：傳唱粵語童謠)
本文來源：大洋網-信息時報 責任編輯： 王曉易_NE0011