藝人萬梓良（萬子）與吳家麗在新片《今晚打喪屍》中再次合作，延續80年代在無綫劇《薛仁貴徵東》、《流氓大亨》合作無間的純熟默契。此片參加了不少國際影展，外國觀眾對兩人的演出都讚不絕口，其中一場戲：萬梓良拿著牛肉刀剃頭，吳家麗則在旁邊嚎哭戲，他們更以「amazing」來形容！
「古惑仔要用牛肉刀」
而該場戲拍攝前，導演Alan與萬梓良先開會商討細節，萬梓良提出用真牛肉刀上陣，令導演大讚超級專業：「我哋提議改用剪刀，但萬子哥堅持古惑仔一定要用牛肉刀，不過開封牛肉刀太鋒利，我哋唔可以要演員冒險。」最後他們決定用未開封牛肉刀加剪接效果，加上萬梓良肉緊表情與中氣十足的對白，效果非常理想。
吳家麗控制唔到情緒
至於萬子哥的對手吳家麗，也交足戲，拍這場戲時，同樣演技爆發，她更跪地哭崩差不多15分鐘，要由萬梓良安慰吳家麗，才能平靜緊張氣氛。吳家麗亦難忘這場爆喊戲，她說：「嗰場戲講我喊到收唔到聲，雖然場戲導演嗌咗cut，但我啲戲未完，啲情緒停唔到，冇得一嗌cut就閘住自己，萬子喺隔籬見到，好擔心我，做演員咁樣系好危險，但後尾我啲情緒紓緩番就冇事。同萬子好耐冇合作，我最鍾意佢演小人物，好細膩，今次佢就系演小人物，今次同萬子啲戲『鏈』得好緊要，我哋唔可以輸畀年輕嘅張繼聰同白只！」
4年冇拍過戲
快將60歲的萬梓良近年因受糖尿病困擾，所以一直推卻多個劇本，已經有4年沒拍電影，萬子接受訪問時說：「接呢套戲我有好多考慮，擔心身體應唔應付到等。我今年60歲，2015年嗰陣食咗9個月中藥，令糖尿病情好轉，而呢套戲系全靠導演、老闆同我之間嘅共同朋友幫手連繫，加上搵埋吳家麗，先打動到我！（會拍多啲港產片？）好開心今次我健康應付到，我講明每日唔可以拍多過十個鍾，但唔系每套戲都可以配合！今次好感慨，我發現依家啲幕後手足只得一個系舊相識！另外，唔慣拍完戲要做咁密集嘅訪問！不過，今次同家麗合作好開心，佢有場戲拍到虛脫咁濟！」