[申請申音]酒釀圓子

作者：西坡

改編：周紅纓

朗讀：田耘

指導、推薦：丁迪蒙

編輯：麥小姐

圖片來源網絡

[由於公眾號平臺讚賞功能規則有變化，如想打賞，可長按打賞碼（頁面下方倒數第2個二維碼），多謝朋友們對「麥唐作」的支持！]

  講酒釀圓子是上海特產，上海周邊個人要跳起來了：憑啥？阿拉搿搭老早就有得吃了！

   講酒釀圓子勿是上海特產，上海人會得賣帳伐：勒本地，無論是餐廳還是屋裡向，只要想吃酒釀圓子，幾乎是360度嘸沒死角個馬上到手，其他地方有得介便當伐？

   講句實在閒話，一種吃個物事，原始產地，即使再講了高級點——提升到地理標誌，重要伐？重要，但是伊只是充分條件而勿是必要條件，因此嘸沒啥特別值得顯擺個意義。

   道理邪氣簡單，啥個物事，勒啥個地方，最終成為啥個「標準格式」，並且還能發揚光大，甚至風靡天下，啥人就是老大。

    鴨梨真正個產地是河北泊鎮，天津只是物流集散中心而已，葛末，有啥人認為「天津鴨梨」應該恢復叫「泊鎮鴨梨」個呢？漢堡包起源於德國漢堡地區，後來傳到美國，幾經迭代，再定格為現在個三明治格式，問問儂：現在還有啥人勒德國漢堡旅遊個辰光會得想去尋所謂「正宗漢堡」吃呢？

   我到過上海周邊勿少地方，也吃過當地勿少個飯，像上海人迭能勒飯局結束前動勿動就點只酒釀圓子、勒餐廳菜單浪向隨便翻翻就能看到酒釀圓子個，多伐？像煞是勿多個!搿搭個原因，講勿清爽。不過有一點：習以為常。「常」了，就會變為集體無意識個傳承，甚至是死板個食俗。

   上海人個口味，既勿像蘇錫幫搿能甜得來發粘，也勿像寧紹幫鹹得來齁勢，一般總歸是以清淡甘鮮為先鋒，以濃油赤醬為中軍。而殿後調和「濃油赤醬」之功，全靠一道甜羹。從前範圍比較大個宴請，唱壓臺戲個，一定是一道甜羹（最後一道再是水果）。

   甜羹可以是水果粒，可以是白木耳，也可以是綠豆湯、赤豆湯，當然還有酒釀圓子。困難時期，糯米憑票配給，等到請酒釀圓子出場，大多數已經是春節前後了，因為只有搿個辰光，每家人家手裡再會得儕有點糯米，做八寶飯，包湯糰，攤糯米餅……還可以燒一盅（一品鍋）酒釀圓子。當然，做甜酒釀，嘸沒糯米是勿來塞個。

   就像酒釀圓子上席個節點搭腔勢，勒蘇州，叫癟子團；勒江西，叫湯米餜……伊拉共同個特點是既是菜又是點心。迭個勒上海是行勿通個：酒釀圓子前頭，是生煎饅頭蔥油麵、桂花拉糕榴槤酥——標準個點心；再前頭，勿是芋艿老鴨湯，就是菌菇土雞湯——標準個硬菜。菜點當前，酒釀圓子自我標榜為菜或者點心，迭個是「犯上作亂」啊，必須擺正位置：既是菜個呼應（中和鹹甜），也是點心個配合（調劑乾濕）；名字儘可能個低調，搭啥個菜儕勿衝——甜羹。

   現在個吃貨，勒吃飯結束之前，老個歡喜百合蓮子，小個偏愛楊枝甘露。伊拉搭酒釀圓子有同樣個名目：甜品，搿就自然而然個搭菜、點心，作了切割。

   上海個主婦老拎得清個，假使拿酒釀圓子算成功熱菜，等於節省了一道幹煎帶魚；假使拿酒釀圓子當點心，相當於宣布取消了八寶飯、春卷個地位，搿是要撥客人講閒話個。儕講上海女人精明但勿失大氣，要是撥一道小小個酒釀圓子弄得人設崩塌，勿作興個啊。所以，迭個模式——點心+甜羹，上海人一直保持到現在，一點也勿覺著有啥勿合適的地方。

   幾乎所有上了點歲數個人對酒釀圓子個成長史儕留下了深刻個印象。從粗暴個搓條摘劑，到細膩個輕揉滾圓，再到精緻個拿捏嵌餡，作為湯糰家族裡最小個成員，酒釀圓子實現了華麗轉身；從手作到機制，酒釀圓子完成了生產力個釋放；進入超市個冷鏈之後，伊讓家庭主婦個雙手獲得解放。

   大魚大肉之後個酒釀圓子可以解油膩；吃醉老酒之後個酒釀圓子可以解酒。有個人歡喜往酒釀圓子裡向窮擺糖，像踢翻了糖罐頭——以為嘴巴甜蜜就是幸福生活個象徵；有個人歡喜往酒釀圓子裡向勾厚芡，就像是勒燒厚粥——以為人生富餘就應該充足綿密……搿是昏了頭！酒釀本身勿帶甜味道個？圓子勿是自來芡個？迭種「兇神惡煞」個吃貨，搭鴻門宴浪吃生個豬腿個樊噲，有啥兩樣？

對酒釀圓子，我從來勿輕易評價，但是勒搿搭屏勿牢要旗幟鮮明個發點逆耳之聲：隨意添加雞蛋花、紅綠絲搭仔拿圓子做得像寧波豬油湯糰伊能大，正好比明明是城裡個全職太太，卻刻意扮成功田裡向做生活個村婦，著老布衣、讓顴骨弄得像蘋果一樣緋紅迭能勿自然。

   相比之下，我又非常樂意接受加點糖桂花，就好像拿從前月份牌浪著旗袍個小姐姐，請到一隻湖綠色個沙發浪向；假使再厾幾粒枸杞，相當於搭伊配了一本《良友》畫報，更加可以彰顯時代畫風。

   《阿甘正傳》裡有句臺詞：「生活就像一盒巧克力，儂永遠勿曉得下一塊是啥個味道。」搿是實話實講，卻拿人生前景描繪得有點忒悲愴了。阿拉是勿是應該想像人生就像酒釀圓子一樣——甜甜蜜蜜，圓圓滿滿，溫溫存存，適適意意？

   快！來一碗酒釀圓子！

朗讀者田耘

阿拉最近還發過：

[申情申音][小說]過把癮就死（十八）

抄朱敦儒《好事近·漁父詞》六首

[廠長傳達室]滿意就好

抄了一些字

[申情申音][小說]過把癮就死（十七）

[申情申音]迭位上海第一美食家，一輩子勿講上海閒話（下）

[申情申音]迭位上海第一美食家，一輩子勿講上海閒話（上）

[申情申音]迭位上海第一美食家，一輩子勿講上海閒話（中）

如何搜索我號已發布的文章：

方法一：按分欄子菜單搜索（如下圖）

方法二：按關鍵字/詞搜索（如下圖）

【麥唐作】即「麥小姐」和「唐廠長」的作品，是以滬語（語音口音偏上海市區音；文本表達參照錢乃榮《上海話大詞典》及《上海話小詞典》）為主打的原創方言專欄。文體、形式自由不羈，力求「做得開心，聽得滿意」。

「麥唐作」又取「賣糖粥」之諧音，願為眾友獻上一份帶著生活回甘的「地氣美食」。

【申情申音】本欄目以滬語朗讀為主打，文字來源可原創，也可選取其他老師的優秀文章進行適度改編（儘量取得原作者的授意，如暫未能及時聯絡得上，也將尊重其原文著作）。

申音悠悠，好文共賞。

本公眾號發布內容（包括音頻及未註明「來源」的文字、圖片）皆為原創，作者保留對作品的著作權。未經授權允許，不得擅自轉載。

非常感謝何東先生和何予西同學、陶嵩飛同學，為「麥唐作」公眾號製作、演唱片尾曲。

如有需要轉載或其他工作邀約：

可添加微信號：Leslie_0207 

或郵件：[e-mail]

 

多謝您的支持和歡喜！