2020-12-22 19:20 來源：澎湃新聞·澎湃號·湃客
原創 周雲海 海上夢疊
作者：周雲海
改寫、講述：孫維陵
滬語指導：丁迪蒙
80後個兒子，一直嘸沒戀愛。親朋好友為伊頻頻牽線，但性格內斂、做事細膩個兒子總是勿來電。一歇歇講搿個性格過於開放，一歇歇又講伊個內心有點陰鬱；或者乾脆覺著姑娘勿好看，或者是嫌對方年齡大了……已經三十好幾個人了，仍舊是孤家寡人一個，勒戀愛上始終是一張嘸沒塗過色彩個白紙。
看看家族裡個兄弟姐妹一個個先後結婚、養小人或者是勒戀愛進程中，五六十年代過來個長輩們要伊：「阿米爾，衝！」祖輩們更加急煞：「士逸啊，儂要抓緊談女朋友了，再等下去，阿拉要吃不到儂額喜酒了！」
盼星星盼月亮。
最近，終于勒阿拉一家三口個生日小宴上，兒子講：「姆媽，我有女朋友了。」還讓阿拉看伊手機裡個照片，小姑娘年輕、漂亮。聽介紹其他方面情況也蠻好個。
終於來電了。
接下來，不是「阿米爾，衝！」搿種直接熱戀個情形，阿拉覺著伊搭小姑娘之間是一種䵑之格拉搭個狀態。
「姆媽，幫忙燒點菜飯，再準備點菜，我中浪送到張同學公司裡一道吃中飯。」做銷售工作個兒子狀態是積極而細膩個。
伊個拔兒子稱之為張同學個年輕姑娘個回應也是細心而周全個。每趟吃過我妻子做個飯菜後，小姑娘儕會勒網浪用快遞個方式拔「周士逸媽媽」回禮，其中有香港個精美糕點，有臺灣名點鳳梨酥咾啥……當然囉，搿一切儕是基於伊拉個情投意合。
我默許兒子勒擇偶上個堅持，我欣賞女小人勒處世上個禮數。
小姑娘還嘸沒上過門，我勒屋裡偶然聽到電話裡小姑娘個聲音。就問兒子：「㑚儕是上海人，哪能勿用上海閒話通話？」
「伊上海閒話講得勿大好。現在老多90後個人儕搿樣個。」
上海小姑娘講勿好上海閒話而只會講普通話，勿是啥個缺點，別過我心裡還是咯噔了一記。
……
睏夢頭裡，小孫子奶聲奶氣個搭我講閒話，伊一口標準流利個普通話，拿我搿個老上海也繞進去了。孫子講：「爺爺你的普通話說得四不像，難聽死了。」「阿爺是上海人，勿習慣講普通話。寶寶儂搿個上海小人哪能勿會講上海閒話呀？」
突然夢醒了。
阿里搭有孫子啊，兒子個女朋友還嘸沒上門來。勿過，觀察兒子戀愛個情況，搿個緣份啊想必是跑勿脫了——媳婦會有個，孫子或者孫囡也會有個。就是午夜夢回，吾心生憂慮：我搿個寧波籍個上海人，上海閒話是我語言交流個第一母語；兒子雖然能流利個講上海閒話，但是就像滑稽戲裡調侃一些滬語發音勿純個人講上海閒話搿樣，「就是有個別字眼咬勿準足」，未來個媳婦則是上海閒話講勿好；我搿個期待中個孫輩將來勒儕是普通話語境個影響下頭，上海閒話恐怕是只能聽勿會講了呀。那再以後呢？
我個憂慮勿是夢。
現在上海本土年輕人群中，勒非公眾場合勿講上海閒話個現象還是蠻多個，而且有年齡愈小愈勿歡喜講上海閒話個趨勢。日長世久，吳儂方言中個重要別支——阿拉個上海閒話，勿是就要消失了嗎？
搿勿是杞人憂天啊。
勒普通話已經勒全國範圍內極大普及個現在，我覺著勒上海大力提倡、推廣勒非公眾場合講上海閒話是老有必要個。勒華夏大地，普通話可以獨領風騷，但勿要讓方言拔普通話輕易取代了，甚至吞沒了各地方言！每一種地域方言儕源遠流長，伊勿僅是此地區別於彼地個一種語言特色，還更有其深厚個文化積澱搭歷史意義。
一方水土養一方人。作為現代人，堅守搭保護祖先傳承下來個上海閒話，勿僅必要，也非常重要！
作者：周雲海
講述者：孫維陵
滬語指導：丁迪蒙
原標題：《我個憂慮不是夢》
閱讀原文
關鍵詞 >> 湃客
特別聲明
本文為澎湃號作者或機構在澎湃新聞上傳並發布，僅代表該作者或機構觀點，不代表澎湃新聞的觀點或立場，澎湃新聞僅提供信息發布平臺。申請澎湃號請用電腦訪問http://renzheng.thepaper.cn。