2020-05-21 13:04 來源：澎湃新聞·澎湃號·湃客
原創 薛理勇 海上夢疊
作者：薛理勇
滬語改寫：丁曙立
誦讀：李國琪
指導、推薦：丁迪蒙
《詩經》是我國第一部詩歌總集，也是研究中國古代文化個重要著作。《詩經》當中個「風」，主要收錄當時各個地方個民歌、民謠，而民歌個歌詞，大多數又是取自於百姓身邊熟悉個事物來作比喻個，其中就提到了勿少植物搭仔動物。於是，《詩經》當中涉及到個「草木魚蟲」，就成為了研究中國古代生物個珍貴史料。
梅，是中國個特產，也是古代最早撥認識搭仔培植個花、果兼用個樹種之一，《詩經》有好幾篇詩提到梅，其中最直接個就是《召南・摽有梅》：
摽有梅，其實七兮。求我庶士，迨其吉兮。
摽有梅，其實三兮。求我庶士，迨其今兮。
摽有梅，頃筐塈之。求我庶士，迨其謂之。
「召南」是西周時期一個南方個地名，迭個地方也受到周文王個教化，女子儕曉得應該及時出嫁，即以梅子代表「妹子」，向男個發出示愛個信號。「摽」即落下、打落個意思，我拿伊翻譯成白話詩：
梅子熟了會自然落下，樹上只剩七成梅子。親愛個阿哥加把勁，趁吉日搭阿妹相會。
梅子熟了會自然落下，樹上只剩三成梅子。親愛個阿哥加把勁，趁吉日與阿妹相親。
梅子熟了會自然落下，採摘個梅子裝滿筐了。親愛個阿哥加把勁，選個吉日來定親。
「梅」搭「妹」諧音，「梅子」常莊撥當作「妹子」用，現代民謠裡向，也有「青青梅子及時摘，黃熟梅子無人要」個講法，就是勸已到了婚嫁年齡個姑娘要及時出嫁，一旦人老珠黃，成了「聖女」，想嫁也嘸沒人要了。
……
梅、杏、李儕是屬薔薇科落葉喬木，是近緣個植物，梅原產地中國，也以中國個種植量最大，所以英文當中嘸沒搭梅樹相對應個詞，英文plum既指李，也指梅，為了表示區分，拿梅花寫作plum blossom，而梅子則是sour plum，就是「老酸個李子」。
梅雖然是花、果兼用個植物，但是梅子忒酸，果實又小，而伊勒早春還嘸沒長葉子個辰光就來煞勿及開花，搿個辰光大多數個植物還處於冬眠期。「一枝獨芳」個梅花撥古代個文人騷客賦以更加多個文人情懷，使伊具備了相應個人格化個成分，伊個觀賞價值就遠遠叫高於果用價值了，賞梅，也就成為了中國文人邪氣獨特個情懷。
梅樹開花以後開始結果，初夏就進入了採摘期，沒熟個梅子顏色是青個，稱之青梅，成熟以後變黃，稱作黃梅。勒江南，青梅變成功黃梅個季節，就是多雨個季節，搿個辰光就撥叫作「黃梅天」，落雨撥叫作「黃梅雨」或者「梅雨」，而英文又稱之為plum rains。看來，「梅雨」「黃梅天」個名稱由來，確實是來自於梅子泛黃個季節。
勿論是青梅或者黃梅，儕是邪氣酸個，所以，梅子老少生吃，大多數用來加工成為蜜餞。成語有「望梅止渴」，出典《世說新語》：當年曹操帶領軍隊遠徵，太陽高照，士兵饑渴難熬，曹操搭士兵講，前頭有片梅林，趕到伊面去紮營。士兵聽到「梅林」以後儕「口皆出水」，梅子之酸可想而知。於是，梅子就多了幾隻雅號，「止渴將軍」搭仔「曹公」。
作者：薛理勇
朗讀者：李國琪
原標題：《青青梅子及時摘，黃熟梅子無人要（上）》
閱讀原文
關鍵詞 >> 湃客
特別聲明
本文為澎湃號作者或機構在澎湃新聞上傳並發布，僅代表該作者或機構觀點，不代表澎湃新聞的觀點或立場，澎湃新聞僅提供信息發布平臺。申請澎湃號請用電腦訪問http://renzheng.thepaper.cn。