2020-05-12 16:19 來源：澎湃新聞·澎湃號·湃客
侯寶良 上海老底子
大熱天裡憶「兒歌」
文 / 侯寶良
眼看大熱天就要來了，想起小辰光放暑假，阿拉搿點小巴辣子一道做遊戲，唱兒歌童謠個事體。
小辰光一到大熱天，阿拉男小人辣穿衣裳方面是最隨便嗰，往往渾身只有一條短褲、一雙木拖板，一整天赤膊到處跑，無拘無束。有辰光有鄰居小姑娘看阿拉穿得風涼眼熱，也想學樣，阿拉就會一邊用手指刮面孔，一邊唱：「冬瓜皮、西瓜皮，小姑娘赤膊老面皮！」冬瓜、西瓜儕是阿拉熱天最歡喜吃個瓜果，湊啦一道，唱起來還是蠻順口嗰。
雖然當時暑假裡勿流行到處補課上培訓班，但是暑假作業還是要每天做嗰。假使啥人一天到夜白相不做作業，被其他小朋友曉得了，大家看到伊就會對伊唱：「賴學精，白相精，書包摜到屋頭頂，看見先生難為情！」搿種互相監督學習個效果還是相當勿錯嗰，大多數小朋友儕會改正錯誤。
講到小辰光熱天最開心個遊戲，或許要算捉蜻蜓了。一根細竹頭，一隻小網兜，幾根細鉛絲，就可以組裝出一柄「捉蟲利器」。勿過，後來學堂裡上課辰光，老師講蜻蜓是益蟲，阿拉搿點小朋友就改捉知了了。記得還有一首專門講蜻蜓個兒歌：「小蜻蜓，大眼睛，兩隻翅膀薄又長，飛東飛西忙來西，消滅害蟲有本領。」
大熱天經常落雨，阿拉小朋友出去白相一般儕勿帶傘嗰，落雨就尋地方躲一歇，反正一歇歇太陽就出來了，而且，落過雨以後，天氣會風涼交關，所以阿拉儕蠻歡喜落雨嗰。當然，有辰光一時半刻尋不著躲雨個地方，也會淋著雨，被其他小朋友看到，有人就會唱兩句：「大頭大頭，落雨不愁。人家有傘，我有大頭。」被調侃一下，阿拉也只是一笑了之。
小辰光一般儕是雙職工家庭，假使屋裡有小毛頭，阿哥阿姐一旦有空儕要幫忙照看。記得鄰居有一個小姑娘照看小毛頭個辰光最歡喜唱：「弟弟眼睛小，倦了要睏覺。姐姐坐到搖籃邊，一邊拍唻一邊搖。寶寶安穩睏一覺，明朝門口採葡萄。」
記憶裡還有一段宣傳除四害，搞環境衛生個順口溜：「六月裡個瘌痢真苦惱，蒼蠅盯來蚊子咬。消滅四害頂重要，瘌痢聽得哈哈笑。」也有人用搿段順口溜譏諷因為勿講個人衛生，引起頭浪生疥瘡個人。有辰光大人也用來嚇唬勿肯汏頭個小人：「儂看儂頭浪介齷齪，勿汏清爽要生瘌痢頭嗰」。想想瘌痢頭個苦惱，阿拉汏頭儕老用心嗰。
吃過夜飯汏好浴，大家儕會到弄堂裡乘風涼。搿歇辰光，小朋友白相個遊戲儕比較文靜，免得再出一身汗。我記得有一種兩個小朋友互相用手指掐手背個遊戲：一方用左手個拇指、食指與中指去捏對方個右手背，同時念念有詞：「哦吆哇，做啥啦？蚊子咬我呀，快眼上來呀。上來做啥啦？」然後兩個人輪換。
小朋友一道做遊戲，難免有輸有贏。假使有小朋友輸得急了哭出來，也有兒歌可以「治療」一下：「一歇哭，一歇笑，兩隻眼睛開大炮。一炮開到城隍廟，城隍老爺哈哈笑。」
雖然童謠詞句簡單，內容也勿講究是勿是符合邏輯，但是讓阿拉個童年充滿樂趣，即使現在回想起來還是蠻有意思嗰！
原文刊於2019年6月16日《新民晚報》上海閒話版
配圖：《上海童謠》李守白剪紙作品
鳴謝：侯寶良先生賜稿分享！
侯寶良先生懷舊文匯
➤老早子調房子
➤老早子個小書攤
➤老底子個茶館店
➤小辰光春遊
➤鄰舍道裡個稱呼
➤掮排門板
➤阿拉老早用「圍脖」
➤過年吃水筍
➤兩種「加油」生意
➤啼笑「BP」機
➤立夏吃蛋、稱人，儂曉得哇？
➤代客加工年貨
➤「零拷」生意
➤老早做裁片也是DIY
➤中秋自家做月餅
➤天冷了弄只鹽水瓶焐焐
➤閒話刨花水
上海老底子
每天為儂送上精彩文章一組
打開塵封的記憶，尋覓往昔的歲月
敘上海老底子事
憶上海老底子人
訴上海老底子情
以史明志，以啟未來
原標題：《【老裡八早】大熱天裡憶「兒歌」（作者：侯寶良）》
閱讀原文
關鍵詞 >> 湃客
特別聲明
本文為澎湃號作者或機構在澎湃新聞上傳並發布，僅代表該作者或機構觀點，不代表澎湃新聞的觀點或立場，澎湃新聞僅提供信息發布平臺。申請澎湃號請用電腦訪問http://renzheng.thepaper.cn。