雨僑今年8月為丈夫羅力威誕下女兒Harper，昨日一家三口和雨僑父母，到酒店慶祝Harper出世100日，舉行簡單的百日宴，影相留念之餘，雨僑亦在網上撰長文分享升呢做媽媽的感受。
雨僑留言：「Happy 100 Days！最後都系擺唔成先生期待嘅<龍珠>主題百日宴喇😒😂，不過我哋都渡過咗愉快嘅一日，由懷孕後期到初生三個月，半年我無拍過片無寫過任何深入分享，全天侯（候）照顧@harperllov，所以而（依）家點都要長氣一下。
呢一百日佢喊得多，我喊得仲多，由每分每秒都唔知佢喊乜，總之就日喊夜喊，一日嘔溼十幾套衫，鍾意就三日唔屙屎，到知道佢有肚風呀搓肚仔呀，人生目標短到淨系想你挨過一餐奶，唔好三個鐘頭全喊，見到你成條蟮（鱔）咁fing嚟fing去，個肚一定好痛真系好陰功😢。
到而（依）家基本上系我幻想中嘅BB食玩瞓，真系萬水千山，為咗唔好嘈醒對方，總之諗得出嘅都試過曬，包括一個瞓一個匿喺㕑（廚）房抱住，因為㕑（廚）房最遠，最長試過十四五個鍾無離開過我心口，條頸同對手睇完醫師馬上又痛返，媽媽手已經唔理，系媽媽背媽媽膊媽媽全身，無數個夜晚抱住佢望住個天由黑變光，嗰種感覺真系難以形容，但系相信好多媽媽同我一樣，會覺得自己湊系值得，同埋就算有人幫嘅媽咪都唔會舒服太多，可以抱就抱因為佢大個就唔使你抱，望住佢初生細細粒到肥肥白白識笑，真系覺得好幸福。
收到好多百日媽媽問我點算好，以前你問我暗瘡點算毛孔點算，我有10個方法比（畀）到你，新手媽媽嘅辛酸，我真系只可以同你攬住一齊喊，然後咬緊牙關繼續戰鬥。
無論如何，知道好多朋友都系睇咗我嘅分享十多年，我都會繼續同大家分享，尤其今年媽媽們，其實所有人都系好難捱嘅一年，我哋一齊加油💪。
#其實我真系有咁長氣#唔知有冇人會睇#唔介意嘅話我每日都有好多嘢想講#只系過去嗰半年無時間打」