隱藏係身份證嘅神秘代碼?//三分半小知識

話說係電話同傳真機都未發明同埋普及嘅年代，人們生活嘅現代通信手段就係電報，在座各位可能唔知，講起電報其實同澳門都有段故。澳門人對中國近代電報業嘅誕生同應用，都有唔少嘅功勞，甚至部分電報流傳落黎嘅技術，澳門至今繼續沿用。

電報其實係電嘅衍生產品，通過靜電嘅特性實現信息跨地域同短時間嘅傳播，令人類實時通信嘅夢想奠定基礎。1753年，英國人發明用26條電線分別代表26個英文字母，再透過唔同嘅組合串字表達信息（發報嘅電碼稱為摩爾斯電碼，表示出黎大概係：「·-」）。之後電報技術就傳入中國。但係大家都知道中國嘅文字體系同西方完全唔同，僅僅就係常用嘅漢字就多達3000幾個，《康熙字典》收錄嘅漢字就接近5萬個，根本無可能利用電線黎代表，就咁樣電報技術係中國嘅應用就遇到困難。呢個時候世居澳門嘅鄭觀應（時任上海電報局總辦）就協同法國駐華人員威基傑（S·A·Viguer）參照《康熙字典》的部首排列漢字嘅方法，改編出《中國電報新編》，首次有系統咁利用四位阿拉伯數字黎代表中國文字，然後利用摩爾斯電碼傳送。從0001到9999收錄咗近萬漢字，之後電報正式可以用於民間信息傳播。雖然電報成功係中國應用，但係要正確打出摩爾斯電碼依然好考技術，所以需要有專門嘅電報員；由於發報費用好貴所以亦有「一字一金」嘅講法。

雖然現時人類連電話、傳真都不常用，即時通訊軟體wehcat、line、zoom等成為新嘅通信手段，但係電報技術依然存在係我哋嘅身邊，舉個例子係澳門，我哋身份證中文名下面都有一個電碼，方便辦證嘅公務人員輸入。雖然唔覺眼，但係卻係真真實實存在係我哋日常生活中。假如將來我哋有野想表達，但係又怕醜唔敢講的話，都可以試下用電碼，別出心裁之餘都有顯得有心意。