（續上文）熙仔老竇喺廁所出來之後就問『做乜咁好傾吖？彭彭叔叔教咗你乜嘢成語吖？彭彭叔叔係讀中文嘎，你要聽佢講啵…嗶哩吧啦……』。跟住熙仔就追問我『咁呢個鐵柱磨成針又係講明咩道理呢』？我答佢『即係話唔用腦，唔環保，浪費資源，做無用功囉』（此處我見到老友開始滴汗）。『嗱，明知要磨支針咁幼細。點解唔搵條鐵絲去磨，而係搵條鐵棍去磨呢？擺明就係唔用腦同嘥材料，嘥時間，嘥水，浪費資源，汙染環境，做埋啲無用嘅工作啦。』聽到呢度，我老友忍唔住挺身而出要加以糾正。『阿仔，唔係咁嘎！其實呢個故事係講明要有耐心，有毅力就可以講艱難任務完成。你咪聽彭叔叔亂咁教你吖』。我忍住笑，裝作無辜咁望咗一下熙仔。熙仔就即刻問佢老竇『咁，點解佢唔搵條鐵線去磨，而係搵條鐵棍去磨呢？』哇，我老友塊面即刻黑過小北路啲老友。
其實，我哋平時睇一件事都可以有唔同角度。咁點解睇呢啲成語故事就唔可以有自己睇法同角度呢？就好似『沉魚落雁、閉月羞花』呢句說話。未必一定係話:用來形容某女靚到魚都唔好意思窺視，大雁都忍唔住飛落地面欣賞。月兒都要用雲朵遮蔽，花都要羞澀得含苞。都可以換一個角度話:呢個女子醜到魚都無眼睇，大雁飛過都嚇到跌落來。月亮返去瞓，花都寧願謝。其實都講得通嘎。
俾小朋友習慣多啲思考角度，絕對唔係壞事吖！