等咗二十分鐘……
（就得架喇！）
四十分鐘……
（好快就食得架喇！）
二百四十分鐘……
（真系真系就食得啦！）
唉，仲未食得，預咗架喇！反正你要等～～寂寞到夜深～～～先有食，不如回帶返去一日前既畫面啦！
去片！
琴晚，你捱住眼訓傾咗幾個鍾電話，即將收線之際，你女朋友講咗一句，讓全國十三億人震驚，印度都感受到小小震動：「BABY，成日出去食太唔健康啦！不如我聽日煮餐飯俾您食啦！」
一言驚醒洛克人，你聽到呢句已經覺得有少少肚痛，口震震咁話：「好～好呀～～～」「BABY？做咩口窒窒既？」「噢…BE Because…」
「你想食咩先？」
「最簡單個D就得架喇……雞翼啦…」
「咁睇少我！我依家睇下D食譜先！您早D休息啦，BYEBYE！」好……我都寫下遺書先……第二日，一朝早你就收到佢既電話，佢話：「我就出門口去買餸啦！」，你個句「乜要咁早買架咩…」都未講完，佢已經收咗線。
諗諗下都唔算早既，將佢平時化妝Set頭既時間，加埋句「就出門口」四捨五入，都即系幾粒鍾之後啦。
下午五時正。
「叮噹叮噹」，門鐘響起，你望一望表，心諗：「都話咗架喇…」。
一打開門，你見到一頭散發，冇化妝，拎住一抽二抽既佢企系門外，論論儘儘但仍然笑住咁同你講：「嘻！我買咗好多你鍾意食既餸呀！」當你望到佢條最心愛既裙染咗D又腥又臭既魚血，你問：「你條裙……」，佢望一望，完全唔當一回事，輕輕咁講一句：「咦？…唔緊要啦！」你有D心痛同感動，從後緊緊咁攬住佢。
不過佢好快就推開咗你，頭也不回咁踏入廚房。當你想跟埋入去睇下，佢就話：「先生，呢度唔入得黎架！你系出面等下喇！」如是者，你就懷住等BB出世既心情，一等，就等咗……四個鍾。
好，終於都返番黎現場。
晚上九時正。
檯上放咗三餸一湯。
你一坐低，佢就將只雞翼夾比你，問：「點呀，好唔好味呀？」但其實你都未放入口……雖然只雞翼一D都唔入味，紅紅地好似唔系咁熟、只煎蛋有D燶，菜心又好似油浸……「系咪唔好食呀…？」「好…好好食！」
唔理好唔好味，你都照單全收，因為你望到佢只手，原來比油彈到紅曬，平時鬱D就話辛苦，鬱D就話痛既佢，由迫入市場買餸，直到呢刻，都冇同你抱怨過，而只系想聽你贊佢一句。
有乜比食自助餐更滿足？
就系兩對筷子，加一個願意為你做煮飯婆既女人。
原來，呢餐飯，唔系一個惡夢，而系一份窩心。
系喎，講咗咁耐，D飯呢？
「呃…原來我唔記得咗禁著個電飯煲添……」