不知不覺3月已經過半
動漫嘅季番即將結束
而4月嘅新番都已經確定曬
大部分都係續作番
相信最受期待嘅都係《進擊的巨人》第二季
而有網友整理咗一份番表
仲將其他時間已經確定嘅新番都一併整理
然後有眼尖嘅網友發現咗一部久違嘅神作
《魔卡少女櫻》
大家細個肯定都追過啦
TVB嘅配音版、屬於我哋嘅
《百變小櫻magic卡》
絕對係大家嘅集體回憶
新制嘅動畫連載改自2016年7月發行嘅
20周年紀念作品
《魔卡少女櫻：CLEAR CARD篇》
故事屬於「庫洛牌篇」同「小櫻牌篇」嘅續作
「透明牌篇」時間設定係小櫻同小狼重逢之後
而小櫻都終於升上中學一年級啦！
最令人感動嘅係日版配音聲優全員到齊一個不變
滿滿的回憶殺
雖然新作要明年1月先放送
不過依家開始重溫一下過去劇情就差唔多啦
作為初代萌神嘅木之本櫻
絕對係大家為數不多印象深刻嘅角色
小編仲記得細個嗰陣好希望可以好似小櫻咁
日日都可以踩Rroller返學！
小櫻同小狼嘅CP線
小櫻同知世嘅百合線
（細個會認為係好單純嘅友誼）
劇中嘅每一個角色都可以講到如數家珍
不過最最最最估唔到嘅都係
哥哥同雪兔哥居然係BL線！
天啊有啲毀童年
以前嘅我哋果然都係很傻很天真
「蘊藏住黑暗力量嘅鑰匙
係我面前顯示你真正嘅力量
契約之下，小櫻命令你即刻
解除封印！「
哩段臺詞有冇喚醒你腦海深處嘅記憶？
雖然小櫻千辛萬苦終於從小學生變成初中一年班
不過現實中嘅我哋已經由小朋友變成成年人了
可以話大部分廣州朋友仔嘅童年都係TVB俾嘅
除咗百變小櫻之外
仲有邊啲係童年經典呢？
比卡超、小火龍、奇異種子、車釐龜、比比鳥....
無論以後嘅小精靈有幾犀利，留係我哋心裏面嘅小精靈永遠都係佢哋，唔知你當年最想收服嘅小精靈又係邊只呢？
」哆啦A夢你今次一定要救我啊！「每集大雄都一定會咁喊住同哆啦A夢講，然後我哋就知道咗任意門、記憶麵包、竹蜻蜓、時光機...
無論係叮噹定係哆啦A夢，都一路陪住我哋成長，依家大咗見到電影院有劇場版仲係會入去睇，好想學軒叔唱返句「叮噹可否不要老？」
哩部動畫簡直男女通殺，數碼獸細個得意大個型仔，次次同黑色齒輪嘅數碼獸打都睇到超肉緊，主題曲《BRAVE HEART》又燃又好聽，幾乎係細個第一首識唱嘅日文歌！早兩年仲重出第一部嘅續集《數碼寶貝tri.》，時隔咁多年聽到進化曲再係耳邊響起，相信你同我都忍唔住眼溼溼。
全劇高能賣萌，因為哩部動畫好多人都加入養倉鼠嘅行列。Twins唱嘅主題曲《跅跅步哈姆太郎》經典到飛起，小編最記得嗰只成口鄉下話嘅倉鼠！
除咗TVB，亞視都會播下動畫片，《遊戲王》可以講係佢揀得最成功嘅。想當年，遊戲王嘅卡片可以講仲矜貴過銀紙，身邊幾多男仔瘋狂買卡包，放學死都唔肯返屋企就係為咗玩多兩鋪遊戲王？
大家對哩部動畫嘅劇情可能印象唔深唔深，不過你一定唔會唔記得哩位傑他阿伯！
想當年日日放學睇佢跳草裙舞，永遠都講住嗰句
「吱吱喳~boom boom ba~」
真係覺得佢好鬼煩又好鬼好笑
其實童年嘅經典又點會數得完？
每一部都係珍寶
每一部都曾經令你廢寢忘餐
當年做功課寫錯過嘅字
計錯過嘅數
又有幾多係因為佢哋呢？
你嘅童年最愛又係邊部呢？
YOU生活出品，公眾號轉載請先至後臺詢問
無條件歡迎分享轉發朋友圈
要報料可掃下方二維碼或致電報料熱線：22148333