紅袖子:搵鬼睇古 第十四章 是真相,還是夢幻泡影?​

第一哲學

紅袖子：搵鬼睇古 第十四章 是真相，還是夢幻泡影？

 

作者聲明：本版所有故事乃跟據真人真事寫成，版權所有，不得轉載或抄襲，違者將予法律追究。

第十四章     是真相，還是夢幻泡影？

 

' 果三道符呢，雖然我唔知佢具體係咩效用，不過除咗用嚟除障作福之外，我估佢可能有一道符係用作保薦書之類，即係有啲似用嚟保送隻嘢入學修道果類手續....'

 

' 乜你講到隻嘢同菩薩好似識得咁嘅，宜家玩細叔伯保送世侄入大學進修咩？佢就算唔係鬼，都應該係啲魔怪妖邪之類，你都話佢可能有幾百年道行啦，佢係出嚟害人個喎，佢哋一正一邪點可以靜靜雞夾埋嚟講數㗎，宜家仲話佢哋傾掂咗添？'

 

' 蝦 ~ 你唔比人哋忽然間改邪歸正嘅咩？咁我哋周不時都有聽到話啲黑社會大佬呀，金盤洗手撈番正行呀咁啦，俗語都有話正邪難定分界，正邪一線之差啦，如果隻嘢想離開魔道懺悔從良，菩薩冇理由唔侵佢玩個喎！'

 

' 嚇，咁都得？'

 

' 我哋佛道二教，最常為眾生開方便之門，只要放下屠刀就可以立地成佛，佢既然願意行番正道，以後就唔會再加害你個女啦，咁你仲唔摞飯應！'

 

' 係就梗係好啦，如果佢真係懸崖勒馬比番個女我，以後過主唔再響我屋企搞搞震，我真係多謝佢都嚟唔切呀。'

 

' 咁咪好咯，所以我估計心心應該冇事㗎嘞，命運之中有樣野叫做 「命不該絕」 ，菩薩唔答你既乩文，我諗係因為件事已經比佢解決咗，所以佢唔使教你再做啲乜野嘢，淨係叫你煲藥比心心飲，等佢安神定驚，你哋一切都回歸原點，無事發生過，你宜家可以放心曬啦。'

 

' 咁你呢個就係真相嚟㗎嗱？'

 

' 真相 ？我都唔知咩係真相喎！我都係根據我眼見既嘢嚟做推理㗎咋。我都話咗我既能力係好有限㗎啦，欸，橫掂世上所有事物都係假嘅，就算果啲所謂既真相其實都係假㗎，呢個世界係冇真相呢樣嘢㗎，你唔好諗得咁複雜啦。'

 

' 我好似仲係有啲野諗唔通哩'

 

' 地球上咁多妖邪鬼物，牛鬼蛇神，有好多野只可以用 「 不可思議 」 四個字來概括，係永遠都解釋唔到，亦搵唔到真正既真相，香港每日發生咁多靈異事件，正所謂多你一單唔多，少你一單唔少，你呢單只算係微不足道，所以你都無謂再糾纏嘞。'

 

阿妹叫我唔好再搵真相，又話世上咩都係假連真相都係假，咁即係點？對於我呢個凡事都要尋根究柢既人，佢既答案真係令我唔多滿意。之後我返咗自己屋企，又諗咗好耐，諗下諗下，最後我唯有自己作咗個真相出嚟。

 

我自己作出嚟既果個所謂真相，宜家諗番我都覺得有啲自己呃自己，唔係幾好意思話比人知，所以響呢度我丟埋佢一邊，賣住個關子先，遲些少我會執番上嚟講。

 

講番阿女自從去完省善真堂果晚開始，就完全回復番以往既精神面貌，周不時鬼鬼馬馬，捉住我講東講西雞啄唔斷，高興既時候又會 hea ~ hea ~ 咁笑下。佢為咗考好啲成績，(佢最怕瘀比人睇)，每日都好勤力咁溫書 ~ 佢最中意將成條 list 過百個英文生字寫成幾份 A4 紙周屋貼，衣櫃門啦，雪櫃門啦，窗玻璃啦，床邊條木柱啦，厠所入面幅牆啦，等佢自己可以行到邊度都溫習到。佢呢種自強不息，孜孜不倦既治學態度真係令到我呢個當年考笫尾二既媽咪汗顏。

 

佢除咗記得曾經有人嗌佢個名，同埋有位叔叔比過一大杯顏色水佢飲之外，對果個幾月發生既事幾乎全無印象，佢咁樣斷片法固然令我加倍安心，慶幸我哋終於可以重新過番啲正常生活，晚晚大覺瞓。(最衰我呢份人成日都心存僥倖，一安心啲懶惰蟲就會走曬出嚟，如是者果條攝住響我銀包入面既菩薩葯方，從此就冇比我拎過出嚟)。

 

不過我只係安樂咗幾個禮拜，就又再一次擒擒青慌失失咁撲入屯門搵阿妹，因為到咗十一月中既某一日，發生咗一件再次令我神經崩潰既事件 ~ 阿女學校一個住響我哋附近，(與佢既單親母親同住)，當時就讀梗中三既師姐，竟然毫無預兆咁由佢十幾樓既屋企跳咗落街。

 

我果朝一睇到《東方日報》果條頭條，簡直就好似比雷劈中一樣咁震驚 ~ 我第一個反應就係，嘩，阿妹真係準到唔準，佢果日話: ' 你睇住吖，唔夠兩個月佢學校一定掟一件落嚟！' 估唔到真係比佢講中咗，連時間點都講中埋！！

 

最慘就係《東方》登埋阿中三師姐張校服相響頭版，仲要登到大大張，使我不其然諗番起阿女為開學而影既果張大頭相，亦係著住相同款式既校服 ~ 我眼定定咁望住張報紙相，一時好似分辨唔到張相係中三師姐個大頭，定係阿女個大頭。

 

我揸住張報紙入屯門搵阿妹，內心完全冷靜唔到，亦控制唔到自己既心智，抓狂之下幾乎上錯咗入青衣既巴士。響搭巴士入屯門果條路上，我個心裡面五味雜陳，不斷係咁亂諗嘢，所諗既嘢亦全無章法邏輯:

 

點解會咁嘅？點解阿妹隨口亂噏既嘢會真係發生咗嘅？呢單嘢一定同我個女有關，睇下我哋兩個既家庭背景幾咁相似就知啦。我成日叫果隻嘢過主，佢唔通真係咁聽我話，真係過咗主去搵中三師姐做替身？如果係咁，我豈不是間接害死咗中三師姐！死啦，如果中三師姐查到係我彈隻嘢比佢，佢會唔會嚟搵番我報仇，又或者搵番阿女報仇㗎？佢會唔會跟我上埋呢架巴士，甚至呢一刻響我後面睇住我㗎？阿妹明明話隻嘢有菩薩保送入咗道門，已經改邪歸正唔會再害人嘅，唔通佢估錯曬？係嘞，佢成日都話自己能力有限，又唔係好熟悉道家嘢，佢一定係睇錯咗估錯咗，不過我唔會怪佢估錯，鬼叫我成日迫佢解釋呢樣解釋果樣咩。唉，點解我呢世人咁倒黴嘅呢？我婚姻失敗事業又失敗，得一個女可以比到少少驕傲我，比到啲人生意義我，宜家佢又命途多磨，好番都唔夠兩個月啫，唔通又要佢面對扭轉唔到既厄運？你叫我宜家點算好？點解上天咁快就要我經歷多一次《午夜兇鈴》級既超級恐懼吖 

 

我越諗越絕望，越諗越多恐怖既幻想，望住前面果條成日撞車死過好多人既屯門公路，我幾乎驚到喊咗出嚟。