轉載 香港face周刊 434期
臨出場前，衞蘭（左）都有啲緊張，不過有妹妹衞詩陪住，當堂定曬。
曾被老闆黎明笑指「肥過部機車」嘅Janice衞蘭，心淡離巢後唞足大半年，最終孖住妹妹衞詩簽約華納，總算有個新開始！
新環境新人事，上週三（9日），周柏豪領軍一班同門師弟妹到北京開騷，衞蘭衞詩擔任神秘嘉賓，之不過，自知身形仍有待修身嘅衞蘭，如今一星期做足6日瑜伽，仲刻意節食減肥，務求以最佳狀態示人。簽約新公司，衞蘭笑曬口話：「好熱鬧！𠵱家有屋企嘅感覺！」乜以前跟黎明嗰陣冇咩？
繼美國後，華納再次曬冷移師北京進行「癲峰聲鬥士」，繼續由周柏豪同連詩雅兵分兩隊進行PK賽，剛剛加盟嘅衞蘭衞詩就首次登場！
事隔大半年，衞蘭已經轉投新公司，出場時人人拍爛手掌，狀態大勇㗎！
成功泊到好碼頭，衞蘭都唔敢怠慢，開始節食減肥，綵排當日都只係食咗個麵包作正餐，就算喺後臺面對一檯美食，衞蘭都只係望下就算，好大決心喎！
開騷前衞蘭（左）都係食個麵包頂肚就算，意志果然夠堅定呀！
正值減肥時期，衞蘭對住一檯美食都不為所動。
一班香港歌手難得到北京開騷，眾人都表現落力，雖然最後由柏豪A隊勝出；不過B隊的衞蘭，可能太耐冇見歌迷，唱〈我願意〉和〈記得〉時反應超好，連隊長Shiga都喺臺下舉牌支持呀！
衞蘭新加入，連詩雅寫出「Janice We love u」以示歡迎。
「日日都有做運動！」
衞蘭接受《 FACE》訪問，她說：「進入新環境、新同事、新老闆，初頭有少少唔係好適應，因為我比較怕醜！華納同事好好，令到我好有屋企嘅感覺！自己都好期待返去studio錄新歌！（減肥中？）我唔係食好多零食嘅人！𠵱家日日都有做運動， at least一個鐘，有時做嚇瑜伽，盡量6點前食嘢！」至於柏豪對衞蘭表現亦讚不絕口，柏豪說：「直頭正啦！兩姊妹好唔同風格！一個好柔，好似天使聲、一個好show到 technique，好有力量！」
SP特別花絮：孖生姊妹默契對決 衛蘭衛詩輸俾A2A
做得孖生姊妹，除咗個樣似到足外，仲要有心靈感應㗎！為咗證實呢樣嘢，《FACE》專登搵嚟衛蘭、衛詩同A2A兩對孖生姊妹進行默契大比拼，每人需要回答10條有關對方嘅問題，睇嚇邊個答啱多啲！
採訪、撰文：張志威 @ face周刊（北京）
攝影：楊學 @ face周刊（北京）