天家[3]交關[4]冷，來該落雪，天快要暗落來了。今末[5]是一年裡向頂壓末[6]一夜——大年夜。來的該又黑又冷個夜裡，一個小娘，看上去罪過[7]不剌，弗戴帽子，腳骨出仔，來馬路裡走。其從屋落走出個辰光還有雙拖鞋爿穿的。該雙鞋爿一直是其拉阿姆來的穿，對其來講實在是忒大了。小娘過馬路個辰光 [8] ，兩部馬車衝過來，嚇勒其拖鞋爿也跌落了。一隻尋弗著了，還有一隻撥一個小娃[9]撮[10]去了。其話其生小人個辰光，好用該拖鞋爿做籮窠。[11]
小娘腳骨[12]出仔走，一雙腳骨凍勒紅一塊青一塊。其個舊圍身布襴[13]個兜裡，有交關多自來火囥[14]的，其手裡還馱[15]勒一梗。今末一日，嘸沒人買其一梗自來火；也嘸沒人撥[16]其一分洋鈿。該小娘又冷又餓，刮刮來該抖，看勒交關罪過。雪花飄勒其長長個金髮高頭。卷卷個金髮拖落來，披勒其肩胛高頭，看上去交關好看。但是其嘸沒心思注意賣相[17]。每一扇窗和總[18]有光照出來，馬路裡純是[19]燒鵝個香氣。「啊，大年夜到了」其忖。
其來兩幢房子當中央央個角落頭裡跍[20]落，腳骨縮仔跔[21]攏來。但是其覺著越來越冷。其弗敢回屋裡，因為其今末子一梗自來火也嘸沒賣出，一分洋鈿也嘸沒賺著。回到屋落，其拉阿伯[22]肯定又要打其。再講了，屋裡搭馬路裡一樣冷。雖然講屋裡有隻屋頂來的，而且其拉已經用稻草搭頂大個縫道堵牢了，但是風仍舊好吹進來。其個手骨[23]已經凍勒木篤篤[24]了。
啊，一梗自來火嘸數[25]好派眼[26]用場。要是其敢馱梗自來火，對勒牆鐾[27]其著，用火暖一暖其個手指末頭就好了。其馱出來一梗，哧，鐾著，火苗噴出來。其手骨圍攏來，火苗又𤉦暖[28]又明亮，像一根小蠟燭。該光交關奇妙，小娘還當坐勒一隻大鐵爐旁邊。鐵爐有黃銅做個把手搭黃銅做個腳。該火咋會介漂亮，咋會介𤉦暖啦！喔唷，咋回事體啦。其忖伸出腳骨烘烘，但是火已經熓[29]掉了——鐵爐也看弗張了。只剩落一梗𤈦[30]過個自來火捏勒其手裡。
其又點勒一梗，火光照勒牆高頭，牆變了像紗一樣好透過去。其透過牆看房間，看見一張桌凳[31]，高頭有雪白鋥亮個桌凳布鋪該。桌凳高頭是夜飯。有蘋果搭梅子，配勒熱氣騰騰個燒鵝，和計[32]𣥼[33]勒漂亮個陶瓷盆裡。頂頂有趣個是該隻鵝，其自家會從盆子裡向[34]跳落來啦。其背脊頂揹勒副刀叉，一步一步朝小娘走過來。但是該辰光自來火又熓掉了，只剩落一堵冰刮斯冷個厚厚個牆。
其又點勒一梗自來火。該回其坐勒一顆漂亮個聖誕樹下底。舊年子聖誕節，其透過富商屋落個玻璃門，看見過其拉屋落個聖誕樹。該晌該棵看上去比其舊年子看見個該棵還要大還要㜅[35]。樹丫杈高頭有幾千根蠟燭點的。各種花花綠綠個圖畫搭商店櫥窗裡貼的個一樣，一張張圖畫頭低勒仔，看勒小娘。小娘手骨伸過去，火又熓掉了。火光越飄越遠，變成天裡一顆顆明亮個星。其中一顆星星跌落來，拖勒一尾巴長長個星光。
「有人要死掉了」小娘話。其拉阿孃[36]搭其話過，一顆星星跌落來，就有一個人個靈魂要回天裡。該世上，是只[37]其拉阿孃值鈿[38]其，但是阿孃已經過世了。
其又對了牆鐾了一梗自來火。火光鋥鋥亮。火光裡向，其看見其拉阿孃，咋會介清爽[39]，介明亮，介溫和，介幸福！
「阿孃哎！」小娘謳[40]起來，「阿孃哎，搭我帶去吶！我曉得嗬，該梗自來火熓掉個辰光，儂也要跟勒走，像該𤉦暖個鐵爐、噴香個燒鵝、漂亮個聖誕樹介。」其快快搭剩落來個自來火和總點著，其覅[41]阿孃走。自來火著起來，比日裡[42]還要亮。火光裡個阿孃從來嘸沒介高大，介漂亮。阿孃搭小娘抱起來，捼[43]的。其拉兩人就介貌[44]飛去了，朝勒光明搭幸福，飛勒越來越高。飛到一個𣍐[45]冷、𣍐餓、𣍐嚇煞個地方——搭神仙一道。
第二天亮[46]，小娘還來的該隻角落頭裡坐東[47]，面孔紅冬冬，一張笑臉，已經死掉了。來舊年子頂壓末一個夜到[48]，凍煞了。新年個太陽升起來，照勒其人裡。其個圍身布襴裡還有自來火，有一𢆞[49]已經𤈦光了。「其忖溫暖其自家」大家話。但是嘸沒人曉得，其看見過介許多漂亮東西，搭其拉阿孃聚頭[50]過了一個幸福快樂個新年。
[1] 自來火：火柴
[2] 小娘：女孩
[3] 天家：天氣
[4] 交關：很；非常
[5] 今末：今天
[6] 壓末：末尾
[7] 罪過：可憐
[8] 辰光：時候
[9] 小娃：男孩
[10] 撮：撿
[11] 籮窠：搖籃
[12] 腳骨：腳
[13] 圍身布襴：圍裙
[14] 囥：盛；放
[15] 馱：拿
[16] 撥：給
[17] 賣相：容貌
[18] 和總：都
[19] 純是：全是
[20] 跍：蹲
[21] 跔：蜷縮
[22] 阿伯：父親
[23] 手骨：手
[24] 木篤篤：麻木
[25] 嘸數：也許
[26] 眼：一點
[27] 鐾：擦
[28] 𤉦暖：暖和
[29] 熓：熄滅
[30] 𤈦：燒
[31] 桌凳：桌子
[32] 和計：全部
[33] 𣥼：盛；裝
[34] 裡向：裡面
[35] 㜅：漂亮
[36] 阿孃：祖母
[37] 是只：只有
[38] 值鈿：疼愛
[39] 清爽：清楚
[40] 謳：叫
[41] 覅：不要
[42] 日裡：白天
[43] 捼：抱
[44] 介貌：這樣
[45] 𣍐：不會
[46] 天亮：早上
[47] 坐東：坐著
[48] 夜到：晚上
[49] 𢆞：束
[50] 聚頭：一起
朗讀&製作：Electric Sheep
排版：神死慟瞑
點擊閱讀原文進入B站觀看原視頻