啱啱先知道新陶街要結業，依家又話寶華路大笪地呢個月底要執笠，你話一班男士同師奶系幾咁失落呢？喺廣州，類似嘅平民集市已經越來越少，呢度改造嗰度又話要收地，實在可惜。
大笪地系香港以前嘅一種夜市，有「平民夜總會」之稱。喺粵語裡邊，大笪地有「一大塊空地」嘅意思。當時香港最出名嘅大笪地喺上環，入邊既有跳蚤市場又有大排檔，有啲似今日嘅廟街。雖然上環大笪地已經冇咗，但系香港其他地方仲有類似嘅市場，俾啲小販擺檔做生意。
廣州大笪地系香港嘅「引進版」，到今時今日已經有廿幾年歷史。佢興起嘅時候，廣州都仲未有咁多MALL咁多商圈，大家平日逛得最多嘅就系東百、新大新、北京路又或者西湖夜市。喺西關呢邊，街坊幫襯得最多嘅就系大笪地上邊嘅走鬼。後來地鐵開通，長壽路地鐵站口嘅一笪地方搭成一個半露天嘅市場，一班走鬼就將個檔口安置喺呢度，成為街坊口耳相傳嘅廣州大笪地。
廣州好多師奶得閒都中意去逛下大笪地。就算唔買嘢，隨便行下都幾有意思。而且呢度交通方便，又近上下九，所以節假日呢度總系人頭湧湧。啲檔口掛曬大字報開大個高音喇叭，呢啲景象，喺CBD裡邊嘅商場又點會睇得到呢？
大笪地好快就要消失，都唔奢望佢可以另地重建。就算重建，可能都冇咗嗰種平民市場嘅味道。趁住周末，大家去行返兩轉啦。