2020-12-16 15:51 來源：澎湃新聞·澎湃號·湃客
原創 華津谷 海上夢疊
作者：華津谷
滬語改寫、講述：高芸
推薦：丁迪蒙
「葉老闆個閒話講得邪氣精彩。但是，我想曉得，今朝我來此地搭各位中國蟲友談蟲論道、交流經驗，是勿是就是拜託了㑚搿種中國式個善良呢？」龜田講，「強存弱汰，搿是自然界一切生物，包括阿拉人類儕應該遵守個遊戲規則伐。阿拉大和民族個性格勿會得覺著啥人作孽，啥人罪過咾啥。所以呢，假使儂葉先生覺著「跑馬黃」忒老了，搭正當年個「繡花針」兩家頭勿相配個閒話，今朝個才即賭鬥我可以馬上就結束。我是勿會得欺負人個。必過，我還是要出高價拿儂迭只南宋古盆買下來個。」 迭個目中無人、神氣活現個日本人，讓本來已經靜下來個三個老人心又吊起來了，為搿只「跑馬黃」個命運、還有伊只南宋古盆個去留，心裡是急得勿得了。伊拉麵孔浪個皺紋，已經看勿出來曾經老吃老做個聰明，也看勿出來有眼啥個經驗了，好像滿面孔儕是慌張。伊拉像煞是落到水裡去個人，眼睛盯牢仔遠遠叫飄過來個救命稻草，當然咾，迭個辰光所謂個救命稻草，就是年輕個葉老闆。
「勿好意思，我忘記脫儂是個日本人了！居然搭儂講眼只有阿拉中國人再懂個閒話，實在是忒荒唐了。」老闆講，「實際浪向，儂還是嘸沒明白我個意思。我講『繡花針』搭仔『跑馬黃』只必過是理論浪個對手，也就是講，勒一般情況下頭，搿歇個『繡花針』正好年紀輕，特別會得打鬥；而『跑馬黃』呢，照理講，伊應該已經到了退休個年紀了。但是，搿只『跑馬黃』勒還嘸沒變顏色之前，就勒我搿種高手下頭調教，伊個壽命會得邪氣長個。葛末，伊搭『繡花針』打相打，也就是屬於硬碰硬個半斤對八兩了。
」葉老闆好像老老奎個麼。」聽到龜田搿能介講，老闆只必過笑了笑，講「葛就讓才即伊拉自家來講閒話伐。」
當「跑馬黃」從妻妾成群個溫柔之鄉，來到迭只殺氣騰騰個橢圓形鬥盆裡向個辰光，過去個威嚴搭仔經驗、一記頭就回到了伊個身浪向。伊像煞是覺著了今朝一戰個重要性，嘸沒像老底子一樣，一落盆先極吼拉吼個奔三圈。伊靜靜叫個趴勒海，一動也勿動，頭角浪向個兩根金顏色個觸鬚，像只雷達一樣勒抖發抖發，探測周圍個動靜。
就算是搿能介，內行個人還是可以從褪脫茸毛個頭頸、大腿搭仔身浪向，看到「跑馬黃」龍鍾個老態。
勒柵閘個另外一面，身強力壯個「繡花針」，並嘸沒因為自家有得年紀輕、牙齒好個優勢而篤悠悠介。伊也是小心翼翼、輕輕叫個移動腳步、晃動伊紫顏色個觸鬚，來熟悉周圍個環境。
為讓大家儕看得清爽，搿場千年難板再看得到一趟個蟲王之戰，就勒秋意逐漸濃厚個後花園個一棵大楸樹下頭開始了。
搿歇，已經是中浪向了，太陽照勒海，輕風吹勒海，樹葉子個影子統統儕落到了擺了鬥盆個紅木八仙桌臺面浪向。
「開始伐？」有得一位老先生問。老闆搭龜田大佐相互看了一眼，點了點頭。挨下來，一隻手一記頭抽脫了鬥盆裡個柵閘。
嘸沒了搿塊柵閘板，「跑馬黃」搭仔「繡花針」立時三刻儕發現了對方。本來勒輕輕叫拂動個四根觸鬚，一記頭儕像鋼鞭利劍一樣，狠狠叫個指牢仔對方。搿能介個局面，並嘸沒維持多少辰光。年輕氣盛個「繡花針」就開始朝牢仔對方個陣地衝過來了。
大家儕嘸沒想到個是，平常辰光又兇又狠、動作快、衝勁足個「跑馬黃」，今朝反倒勿一樣了：人家「繡花針」朝牢仔伊衝過來，伊呢，邪氣有禮貌個朝後頭退了一大步。
「跑馬黃」搿種嚇絲絲個樣子，助長了對方個氣勢。「繡花針」個兩根紫顏色個觸鬚、勒頭頂浪向邪氣快個轉了幾圈之後，就像老虎下山一樣突然之間撲過來了。
強敵來犯，「跑馬黃」自然就張開了金牙齒，盯牢仔對方。伊搿種氣勢洶洶、嘸沒一眼眼漏洞個防禦，居然撥敏感個「繡花針」及時個發現唻。就勒勒兩隻才即馬上就要碰著個一瞬那，「繡花針」個腳步活絡得勿得了，一隻急剎車，邪氣巧妙個避開了「跑馬黃」搿付鐵骨石硬個牙齒。
「繡花針」個機敏搭仔冷靜，得到了觀戰雙方一致個稱讚。但是，伊搿趟虎頭蛇尾個攻擊，也惹毛了「跑馬黃」。寶刀未老個蟲王，覺著有必要教訓教訓搿只年輕個才即，讓伊曉得一隻老老簡單個道理：狡詐搭仔投機取巧，勿是蟲王個品格。乃末，伊就像一部金色坦克車，直別別個朝牢仔對方衝殺過去了。當然，「繡花針」也勿是好惹個，面對仔衝過來個坦克車，抖擻抖擻精神，兩隻翅膀也立起來了，嘴巴裡發出了三記像洪鐘一樣渾厚、凝重個鳴叫聲。「繡花針」也加足了馬力衝上去了。一歇歇辰光，兩對勿同顏色個牙齒橫過來、豎過去個咬來咬去，「嘰嘰咔咔」，發出了刺耳朵個摩擦聲。因為兩隻才即個模子搭仔力道儕差勿多，所以，啥人也嘸沒讓對方朝前頭移動半步。
作者：華津谷
講述者：高芸
推薦：丁迪蒙
原標題：《跑馬黃（九）》
閱讀原文
關鍵詞 >> 湃客
特別聲明
本文為澎湃號作者或機構在澎湃新聞上傳並發布，僅代表該作者或機構觀點，不代表澎湃新聞的觀點或立場，澎湃新聞僅提供信息發布平臺。申請澎湃號請用電腦訪問http://renzheng.thepaper.cn。