今朝是吳越小豬陪伴大家的第 2524 天
非常時期的「蛤蜊燉蛋」
來源：食品與生活
作者：楊忠明
滬語改寫、朗讀：鄔淵敏
指導、推薦：丁迪蒙
點擊下方收聽音頻，時長9分59秒。
非常時期消息頻，夜闌雨聲難入靜。庚子伊始，冠狀病毒疫情席捲全國，上海市民勒屋裡自覺隔離，等待疫病高峰過去。微信朋友圈有人曬出蛤蜊燉蛋圖片，巧用上海閒話諧音「隔離等待」，邪氣應景呀。
年前備個菜不多，老快就吃光了，大菜場勿敢去。正月初五，我戴好口罩、眼鏡，「全副武裝」出去探菜，小區裡菜店還有點年前個剩菜，買了白蘿蔔、青菜、茨菰、大白菜、土豆。
宅勒屋裡抗疫情，吃個小菜也有講究，養生食療可以增加抵抗力，防備病毒侵襲，可以多吃些清熱解毒個菜蔬。記得過去冬天辰光，崑山人歡喜吃白蘿蔔，清熱、潤肺、和胃、消食，上海人歡喜吃蘿蔔鹹肉湯 、蘿蔔羊肉湯、蘿蔔絲拌海蜇皮。小辰光，外婆買來野生小魚，加白蘿蔔粗絲紅燒，一夜天過去，亮晶晶個一大碗蘿蔔小魚凍，邪氣鮮。茨菰入口微苦，性味甘平，生津潤肺，補中益氣，用伊炒肉片、燒雞塊、炒臘肉，冬天吃邪氣適宜個。香芹有清香藥味，明目通鼻，醒腦健胃，潤肺止咳。香芹炒香乾、香芹炒百合儕是我喜歡吃個菜。野菜蘆蒿，分柳葉蒿、雞爪蒿兩種，有一股草藥清香，莖杆鮮嫩，香脆爽口，可鎮咳、化痰，用來清炒豆乾絲，是冬春季清熱解毒之妙品。白果斂肺平喘，冬夜，取10粒白果敲破果殼，擺到微波爐裡去轉3分鐘，捂勒手裡滾滾燙，剝開，果仁青綠似翡翠，入口香糯微苦。
深更半夜爬格子，突然覺著肚皮餓了，屋裡囥了幾袋熟泡麵，填肚皮正正好。今年秋天介買了40隻小個河蟹，豬油1.5公斤，拆了眼蟹粉，篤了一鑊子豬油蟹粉，擺勒冰箱裡，搿辰光正好拆一包泡麵，再擺眼豬油蟹粉燒一碗。白衣戰士，為了老百姓個安危，迭個辰光儕衝勒武漢前線戰鬥，我伲迓勒後方，夜宵還有蟹粉面吃，應該知足長樂唻！
面對疫情，有人提出吃飯採用分食制，我伲中國人最歡喜圓臺面聚餐，旅行社包桌頭吃飯更危險。酒席臺浪，互相勿認得個人一邊窮吃八吃，一邊哇啦哇啦講閒話，筷子上上下下像雨點，饞吐水亂噴，像煞灑勒勿少「調味料」，邪氣容易傳染疾病。高檔酒家勒圓臺面浪擺公筷，形同虛設，大多數食客直接用自家個筷子撈湯裡向個菜，一鑊子鮮美個湯成位了汏筷子水。
有趟，勒酒席臺浪，我看到一位老兄拿勒小調羹直接勒砂鍋裡盛了湯往嘴巴裡送，一勺抄又一抄，忒勿講衛生唻！我注意到同桌個音樂家L先生，每趟菜端上來，伊只用公勺挖一眼裝勒小碟子裡向，人家動過筷子以後個小菜，伊堅決勿碰了。現代人要改變勿良習慣，文明用餐，分食，安靜用餐，輕輕叫個交流。
20世紀五六十年代，上海個食品衛生工作做得相當到位，小個麵館裡個碗盞、筷子汏清爽以後要擺勒一隻老大鋼鍾桶裡向，開水裡燒15分鐘，踏踏滾拿出來，再撥食客使用，就像崑山奧灶館裡個「三熱面」——熱面、熱湯、熱碗。我想，疫情過後，假使有阿里一家麵館能夠學學老上海餐飲業消毒個土辦法，勒門口頭擺只大鑊子，當勒大家個面，開水燒碗筷、進行高溫消毒，肯定會受到食客個歡迎。
有日仔半夜裡，啟東「葛家大院」海鮮酒家掌門人勒微信朋友圈曬出剛剛捉到個一條750克重個野生大黃魚，黃澄澄、金燦燦，眼睛大、嘴巴紅，亮晶晶個。一眼老饕看得眼紅了，儕勒討論哪能介燒法：雪菜黃魚湯、糖醋大黃魚……我估計，搿條魚平常勒飯店開價起碼3000塊，現在行情低迷，葛老闆講：「我個野生大黃魚價已經跌停板，啥人要，2000塊！」沒人應答，是個呀，疫情緊張個辰光，大家儕盯牢武漢個戰況，啥人還有心思品嘗大黃魚呢？有人提出，搿條大黃魚是野生動物勿好吃，我回應，勿要搞錯哦，海裡向個帶魚、目魚、小黃魚、鰻魚多數儕是野生個，搭禁止食用野生動物根本是兩個概念。葛老闆講，伊準備拿海鮮直接打包，或者做成功半成品，網浪銷售，冰鮮快遞到上海，讓老百姓勒屋裡就能品嘗到最新鮮個美食。我問，蛤蜊有嗎，幫我弄幾斤來，我要弄碗蛤蜊燉蛋吃吃……
有抗病毒個超級食品伐？嘸沒。只有多種食物組成個平衡膳食模式，增強免疫力，再能夠最大程度維護我伲個身體健康。豆製品、雞蛋、魚、瘦肉、牛奶、綠豆、大蒜、香菇、獼猴桃、白蘿蔔、花椰菜、生薑、苦瓜、梨、蘋果等等，儕是冬天介相當好個食品。
上海中醫名家陳百先醫生講：「嘸沒能夠殺脫新型冠狀病毒個中藥，中藥只對新型肺炎個症狀起到緩解作用，用藥以清熱解毒、扶正健脾為主。」伊告訴我一隻伊自創個冬天預防感冒個小訣竅：新鮮大蒜適量，斬碎，裝勒只塑料小瓶子裡，瓶底鑿幾隻洞，對牢瓶口拿大蒜氣味吸到鼻頭裡向去，一日天吸個幾趟，或者每天用一瓣生大蒜搗碎衝服，對口腔、喉嚨儕有殺菌作用，對預防各種病毒有相幫作用，具體啥個道理，還要等科學研究個結果出來。
註：本文改編自「食品與生活」，原文可點擊文末左下方「閱讀原文」。
（朗讀者近照）
聲明：
本公眾號發布內容著作權（包括音頻及改編後的文字）皆為本平臺及相應改編、朗讀、推薦者所有，未經授權允許，不得擅自轉載。請保護創作者版權，多謝大家的支持！
註：為了細化公眾號的內容，特開闢新欄目「海上疊夢」，內容為由上海大學語言學副教授、上海書法家協會會員丁迪蒙老師撰寫、改編、指導、推薦及親自朗讀的作品。作品內容涵蓋各方面，並不代表本平臺觀點。本平臺另有「優囡蹦蹦跳」、「海派活動」、「海上訪談」等欄目，敬請關注。
↑↑↑↑↑
想學習上海話的規範寫法？請查閱《上海方言詞語使用手冊》。