作者：沈嘉祿
改寫：周紅纓
誦讀：沈珊明
推薦及審閱：丁迪蒙
編輯：王乙其
尊敬個灶王爺：儂好！
我從小就曉得今朝是儂上天向玉皇大帝述職報告個日腳，也是阿拉人間大掃除、貼春聯、抓緊採辦年貨個歡樂時光。
範成大勒《祭灶詩》裡講：古傳臘月二十四，灶君朝天欲言事。雲車風馬小留連，家有杯盤豐典祀。豬頭爛熱雙魚鮮，豆沙甘松粉餌團。男兒酌獻女兒避，酹酒燒錢灶君喜。……
唐宋時代個中國人邪氣會得過日腳，供撥儂個供品是相當豐富啊。阿拉屋裡嘸啥東西可以打掃，辦年貨也勿急，就搭儂老人家講幾句閒話伐。
今朝，阿拉大城市裡個人住個是樓房，用個是煤氣灶、電磁爐或者微波爐，從前農村裡用了幾千年個土灶，現在個小青年是看也嘸沒看見過，所以也勿曉得儂有多少節棍。
有辰光少男少女躲勒勒廚房間裡做點勿知羞恥個勾當，儂老人家就當嘸沒看見伐，千萬勿要責怪。
上個世紀七十年代初，我勒勒上海郊區學農個辰光看見過土灶，燒個是柴草，火頭旺，煙老大個，有辰光屋頂浪向吊下來一隻老大個紅毛蜘蛛，嚇得阿拉哇哇叫，農民卻是習以為常，笑稱迭個是「喜從天降」。土灶燒出來個飯邪氣香，鍋底會結一層金光閃閃個飯餈，鏟起以後掛勒屋簷下面可以存放好幾天，泡軟以後燒泡飯特別香。阿拉經常去偷飯餈吃，脆，香！
埃個辰光已經移風易俗了，灶臺浪向畫個是向日葵、大公雞、紅鯉魚、拖拉機、大輪船等等，我也搭農民屋裡畫過灶頭畫，㑚猜我畫個是啥？中國第一顆人造衛星！
房東姆媽一邊誇獎我手藝好，一邊神秘兮兮個講：其實，灶王爺還勒灶臺浪向端端正正個坐勒海，儂手藝好，灶王爺儕看勒眼裡，伊會得保佑儂個。
我一邊啃房東姆媽撥我個烤年糕，一邊笑了走出了房門。從革命個大風大浪裡走過來個中學生天勿怕地勿怕，又是肉眼凡胎，拿儂當作空氣，迭個要請儂原諒。
當然，儂也嘸沒保佑我。要勿然我哪能會得吃介許多苦頭。
現在我也算是歷經滄桑了，各路鬼神儕相信，儕敬畏，儕勿敢怠慢。灶王爺儂搭老百姓最親，管個是柴米油鹽醬醋茶，阿拉瞞勿過儂。儂要上天匯報工作，按老規矩是要上供個，不過實話搭儂講，去年勒股市裡賺了點小鈔票，但勒勒最近一個號頭裡撥全部揩光，還賠進了好幾千。
再講阿拉屋裡向也嘸沒做過啥個虧心事，連牢騷也勿敢發一聲，勿怕儂打小報告。
好了，就燒炷香聊表心意伐，迭盒棋楠香還是朋友送個，借花獻佛。
我迭兩年一直勒想，儂灶王爺勒人間行使光榮職責也有得一千多年了，為啥老百姓一邊討好儂，一邊討厭儂，因為有人缺衣少食儂勿匯報，有人吃野菜啃窩窩頭吃冷水儂勿匯報，災荒年十天半個月揭勿開鍋儂勿匯報。即使阿拉城裡人，早幾年，所謂個廚房儕是拾點碎磚爛瓦搭起來個，迭個儂也勿匯報。
而平常辰光勒私底下發個小牢騷，比方工業用鹽冒充食用鹽，配製醬油嘸沒豆香，轉基因豆油吃了勿放心，發黴個大米有黃麴黴素，豬肉打了水還要漲價……，儂倒是一筆勿漏個記下來，然後到玉皇大帝伊面添油加醋個亂講一通。
儂覅勿承認，迭些事體為啥屢禁不止，造假作孽個人嘸沒得到嚴懲，照樣過得無比滋潤，我看聖明個玉皇大帝肯定是撥儂瞞過去了呀！
頂頂要命個是，老百姓還是每年要搭儂上供，以前是糖瓜慈菇屠蘇酒，現在大家條件好了，大白兔奶糖巧克力，香蕉蘋果獼猴桃，奶油蛋糕八寶飯，茅臺老窖五糧液儕上了，儂老人家是趕上了一個好時代！
格末儂上天講好事了伐，回來降吉祥了伐？如果儂確實盡力盡責了，為啥新冠病毒又拿阿拉中國人害得介慘？
所以我認為祭灶搿種事體嘸啥大意思。伊至少有三大壞處：
一，使行賄獲得了正當性；
二，使欺下瞞上獲得了合法性；
三，讓人民群眾一代接一代個進入權力崇拜個怪圈。
撥儂吃香喝辣，儂就講搿家人家個好話，報喜勿報憂，欺騙最高領導。假使供品簡陋眼，儂大概就要瞎編一氣，讓伊拉繼續遭災受苦。
儂表面一團和氣，慈祥可愛，實際浪向對人民群眾缺少憐憫之心。
最嚇人個是，儂處於權力架構個底層，卻勿為人民群眾請命訴苦，而是通過一系列巧妙動作，竭力維護迭個超穩定架構，拿老百姓個一舉一動放勒勒儂個嚴密監督之下，俗話講：頭頂三尺有神明，講個勿就是儂嗎？
吃了儂個苦頭，還要獻出伊拉個膝蓋。搿是啥個道理！
中國人講究慎終追遠，三百六十行，每一行儕有祖師爺，木工個祖師爺是魯班，打鐵個祖師爺是太上老君，屠宰行業個祖師爺是張飛，餐飲行業個祖師爺是易牙，梨園個祖師爺是唐明皇，糕餅業個祖師爺是諸葛亮，現在GM個隊伍正勒勒壯大，賊頭賊腦，無孔勿入，儂是勿是搿一行個祖師爺？
呵呵，覅生氣，我想儂也勿至於介壞。
不過搿一套程序也應該改一改了。
儂假使想勒人間繼續混下去，就要改變作風，端正態度，始終立勒人民個立場浪向。
儂勒廚房間個迭塊業務比較熟，不妨來點創新、拓展，切切實實做好民生保障工作，比方發現火災苗子及時報警，發現飲用水汙染及時報警，食品安全有隱患，要搭主人家提個醒，發現假冒偽劣食品比方地溝油、毒大米、甲醛蔬菜之類個，希望儂儘快報警，並能夠一查到底，記錄在案，到年底來個總算帳。
至於保姆偷吃主人家個頭道雞湯，儂就眼開眼閉算了。
好有好報，惡有惡報，勿是勿報，靠儂匯報。
儂看迭能可以伐？
假使儂能夠做到，格末人民群眾還是能接納儂個，十萬元一平米個天價廚房，儂勒勒C位，祭灶個辰光管儂吃飽，「紙馬」——也就是車馬費伐，一次性撥足。迭個勿是行賄，搿叫做內循環，供給側。假使儂做勿到，格末對勿起，勿換腦子換位子，請儂下崗。
有想勿通個，上天搭領導一訴衷腸伐。
祝儂一路順風，恕不遠送，戴好口罩，回來請出示健康碼！
此致敬禮！
沈嘉祿庚子臘月二十三
———————————————————————————————
作者：沈嘉祿
誦讀：沈珊明
——————————————————————————————
丁迪蒙
迪蒙，啟迪蒙昧者也。上海市人。原上海大學中文系教師，多年來一直致力於滬語和海派文化的傳承。
滬語是吳方言的代表方言，是吳儂軟語的典範。她既可以用來拉家常，也同樣可以用來朗讀各類詩歌散文。
滬語完全可以書寫，同粵語可以寫作是一樣的。本平臺所有文章都是經過改寫後，用滬語來演繹的，漢字書寫也是正確的。
丁迪蒙所撰寫的，與滬語相關的著作主要有：
《學說上海話》上海科技文獻出版社
《聽聽說說上海話》少年出版社
《實用滬語》復旦大學出版社
《上海話繞口令》少兒出版社
《上海方言詞語使用手冊》上海教育出版社
《上海話讀成語故事》少兒出版社
《囡囡學童謠》，少兒出版社。
—————————————————————————————
歡迎大家關注丁迪蒙的另一滬語平臺：海上夢疊