2020-09-26 12:13 來源：澎湃新聞·澎湃號·湃客
原創 沈嘉祿 海上夢疊
來源：老有上海味道
作者：沈嘉祿
滬語改寫、講述：鄔淵敏
文字修正：丁迪蒙
搭盆菜山河並存、日月同輝個，還有和菜。辰光個刻度也是勒上世紀個七十年代末，像煞是某位大佬倌個一聲號令，大小飯店儕一道推出了和菜。
和菜個基本配置是迭能個：四隻熱炒加一隻湯，三四碗白米飯，有葷有素，營養豐富，鹹甜酸辣，老少鹹宜。比方講魚香肉絲、蝦仁滑蛋、八寶辣醬、蠔油草菇、番茄榨菜蛋湯，一般講來四個成年人就可以吃飽了，假使再加個小人，就再添一隻素菜，也就可以應付過去了。吃得飽，有面子，銅鈿銀子省脫勿少，也符合上海人個待客之道。勒批林批孔或者是反潮流個辰光，飯店裡向個和菜是賣得邪氣火個。
各位看官一定會得看出破綻來了：幫派勿正嘛！對個呀，就是勿講究幫派，好吃再是王道，和菜個思路，是要讓顧客用最少個鈔票吃到最多個量、最好個味道。上海人即使勒最最困難個辰光，也勿會得放棄對品質生活個追求。
我阿伯勒休息日腳也常莊建議阿拉一家門到離開屋裡勿遠個，淮海路浪個鴻興館去吃和菜，姆媽總歸要反對：「搿種小菜還是勒屋裡向燒得入味。」其實伊是肉痛鈔票啦。不過阿拉還是去吃過幾趟個，味道當然勿錯個咾。搭我個歡天喜地勿一樣，阿伯要承受個勿止是支出浪向個壓力，還有得姆媽個數落。
有辰光，屋裡向來了人客，一時頭浪來勿及買、汏、燒了，就到鴻興館去吃和菜。
和菜也分檔次個，一元五角、兩元、兩元五角、三元，最高一檔是五元，可以吃到整條個茄汁鯧魚搭仔皮爛肉酥個白篤蹄髈了，五六個人坐下來吃篤倓倓個。
我工作之後和菜還有得供應個，搭兩三個朋友去解解饞，為了圖方便，也會得叫和菜。但是後來覺著和菜對人個智商是勿小個蔑視，做啥勿是自家點呢，為啥勿去享受一下當家作主個胸懷呢！但是，到結帳個辰光再發現，還是和菜佮算呀。
上世紀九十年代物價騰飛，和菜就難以為繼了。
後首來，我從勿少老前輩個文章裡向看到，和菜勒老上海就流行過一段辰光個。吳承聯勒勒《舊上海茶館酒樓》一書裡向講：「徽菜館裡個和菜也邪氣便宜。三十年代，徽菜館搭菜從半塊起，一直到四塊、五塊。半塊洋佃個和菜，也有兩炒一湯，兩個人吃足夠。一塊洋佃個和菜，兩炒一湯之外，還有兩色冷盆。但門檻精個食客寧肯自家去買兩角洋佃個鮮蝦來搶一盆，再到飲食店買兩角燻魚，花費四角洋佃，菜反而豐盛，手續也便當。當時徽菜館個和菜，以叫半塊個最為精明。」冰舟勒《徽館在上海》一文當中也強調：「吃和菜最經濟，夏季勿吃為妙，恐多有勿新鮮。」
啊呀，上世紀七十年代個和菜，原來是復闢呀！
現在，魔都個餐飲市場繁榮、繁華，勿少西餐館推出套餐，前菜有四五種，湯至少有三四種，主菜有牛排、鴨胸、龍蝦、巨無霸漢堡、純素披薩咾啥，隨便揀一樣，甜品也有六七樣。搿能一來，可以讓人少出洋相。
西餐個套餐只供單人享用，日料裡個定食也只供單人享用，上海個中餐廳後來也推出套餐了，強調兩人套、四人套，搿是為共食制設計個。自從有了美團之後，套餐大行其道，勒上點檔次個飯店裡，冷菜熱菜加起來有八道十道之多，折扣一打，人均消費勿算高。
不過套餐搭和菜還是有本質區別個，現在日腳好過得多了。
最近，和菜又悄悄叫個回歸市場。300元、400元、500元……兩葷兩素一湯個格局，茶水免費，白飯挺吃勿動氣，比客飯豪華一眼，兩三人吃到飽，支付寶一掃，賽過撥根毛，經濟實惠，勿失面子，關鍵個一點是勿大會得浪費。
現在大家儕勒反對浪費是伐？假使講上海人精明，葛麼體現勒餐桌上，決計勿是削尖腦袋吃白食，而是勿鋪張，勿浪費，勿張揚，勿失身價。
我想念和菜。和菜又迴轉來了，但是，伊個辰光個就餐氛圍，再也回勿轉來了呀。
作者：沈嘉祿
講述者：鄔淵敏
原標題：《居家吃盆菜，待客吃和菜（下）》
閱讀原文
關鍵詞 >> 上海
特別聲明
本文為澎湃號作者或機構在澎湃新聞上傳並發布，僅代表該作者或機構觀點，不代表澎湃新聞的觀點或立場，澎湃新聞僅提供信息發布平臺。申請澎湃號請用電腦訪問http://renzheng.thepaper.cn。