2020-10-27 15:48 來源：澎湃新聞·澎湃號·湃客
上海老底子每天呈送精彩文章一組
打開塵封的記憶，尋覓往昔的歲月
敘上海老底子事 憶上海老底子人
訴上海老底子情
上海人個淮海路
來源：夜光杯
作者：馬尚龍
滬語改寫、朗讀：丁曙立
文字修正：丁迪蒙
要講高大上嘛，南京路再真箇是算得上。一條大馬路，後頭有得二馬路到五馬路四個小兄弟跟牢仔，淮海路頂多只好算是獨善其身了。凡是上海灘稱得上「第一」個店家、四大公司，儕是開勒南京路浪個。淮海路呢，講出來也難為情，獨多阿二頭，第二百貨商店、第二食品商店、第二醫藥商店……更加嘸沒中百一店、永安公司兩部「自動扶梯」個海威。交關店家還用勿著電梯個，只有一層，不過是勒老式公寓底樓個店鋪。譬如，婦女用品商店、上海鐘錶店、大方綢布店咾啥……氣派搭仔規模儕勿哪能彈眼落睛個。
上海人搭淮海路親，是有道理個。只不過老少有人會想到：「上海人個淮海路」，剛好是從交交關關勒底樓開店個老式公寓起頭個。
以淮海中路為主軸，包括長樂路、復興中路、重慶南路、瑞金路、茂名路、陝西南路，一幢幢豎勒海個是上海最密集個老式公寓。公寓裡向一開始蹲個人，大部分是醫生、教師、演員、職員咾啥。伊拉是知識階層，對文明、修養、時尚、品位個追求，勒上海自然是「春江水暖」，領風氣之先個。伊拉所散發出來個氣質、情趣搭仔品位，變成功了上海人跟風個審美觀，同時也造就了淮海路搭其他馬路勿同個格調。
從公寓房子裡走出來個人，大人清清爽爽，小人規規矩矩，大人講道理，小人懂禮貌。講齷齪閒話個大人搭仔野蠻小鬼是勿可能有個。等我長大以後發現，小學裡向選學生幹部，只要成績好、紀律好，小隊長是閉勒眼睛、啥人儕好當個，但是大隊長呢，一般學生張大仔眼睛也做勿了，儕是蹲公寓房子個同學。密集個公寓群落裡，幾十年裡向出了交關個作家搭仔科學家……
幾十年之後個一趟同學聚會，有個同學原來是矮平房特困戶，十幾年前頭買了老公寓房子，還有個是從小勒公寓房子長大個同學，搬脫了。奇怪個是，兩個人個神色搭仔腔調，從小到現在，嘸沒變過。
淮海路一帶個公寓儘管密集，旁邊畢竟還是石庫門搭仔更加老舊個房子多一眼。勒迭眼周邊居民嚮往公寓個辰光，羨慕也好，嫉妒也罷，公寓個生活方式搭仔道德修養，附近個男男女女儕來學樣了。王安憶寫到過迭能個市井，大意是：一個女人倒好痰盂馬桶，揩把面，搨眼雪花膏，走出弄堂轉只彎到淮海路，就像是淮海路女人了。蹲勒公寓裡個人，勿是榜樣，而是風向標，代表了過日腳個富足、文明、體面搭仔教養。迭個風向標，一眼一眼個，勿管是大楊浦還是南市，上海人儕看到了，儕認可了。迭個風向標，假使要撥伊一個只定義，葛末就是「公寓文化」。
公寓文化是「上海人」邪氣重要個必修課。
南京路雖然是第一商業街，但是伊個周邊，原來是六合路、牛莊路、雲南路咾啥個小馬路，公寓是邪氣少個，大多數是低矮個平房。曾經看到過張舊照片，上世紀九十年代六合路搭南京路交會個地方，大熱天個夜裡向，路浪鋪滿了躺椅，勿少赤膊大仙勒乘風涼。幾十年後儂會得發現，儘管淮海路也拆脫了勿少舊房子，但是老式公寓基本浪儕保留下來了。而勒南京路周邊個小馬路，新樓房造仔勿少，儕是矮平房變過來個。
一條馬路，有老房子，就有了歷史，有獨特個建築，就有了性格，有人文個感化搭仔影響，就有了境界。
有人問，老公寓還勒海，現在個淮海路還是上海人個淮海路伐？要我講，只要老公寓勒海，伊就是淮海路個招牌。搿個就足夠了！
（淮海路街景 周培元攝）
（本文作者）
（本文朗讀者）
來源：吳越小豬
原標題：《【滬語悅讀】上海人個淮海路》
閱讀原文
關鍵詞 >> 湃客
特別聲明
本文為澎湃號作者或機構在澎湃新聞上傳並發布，僅代表該作者或機構觀點，不代表澎湃新聞的觀點或立場，澎湃新聞僅提供信息發布平臺。申請澎湃號請用電腦訪問http://renzheng.thepaper.cn。
相關推薦
評論（）