前一段辰光朋友圈被一張照片刷屏：一個禮拜裡，溫度從21攝氏度、25攝氏度、27攝氏度、30攝氏度，一記頭躥到39攝氏度。後來氣象臺馬上出面闢謠，講是某些手機軟體個「大數據系統」出錯了，其實只有28攝氏度。
勿過，搿種「高燒」日腳說來就來，一記頭就熱起來也勿是勿可能。喏，中浪向，太陽下頭走辣馬路浪已經曬得有點頭昏了。
彎進超市8塊洋鈿買根雪糕。辣末生頭想起小辰光，爺娘下班回來，用一隻胖篤篤矮墩墩個竹殼熱水瓶裝回來個冷飲水，有辰光是鹽汽水，有辰光是酸梅湯。
從泡進熱水瓶到拎到屋裡向，起碼也有個把鐘頭了，吃到嘴巴裡冷飲水會覺著已經稍許有一點點溫吞了。勿過，一碗酸梅湯，甜咪咪酸嘰嘰，是大熱天裡阿拉小朋友伸長仔頭頸盼好仔個好物事，而且，還是覅花銅鈿嗰。
後來再曉得，酸梅湯幾乎是阿拉國家個國民飲料了。北京有信遠齋個酸梅湯，交關老吃客儕對伊念念勿忘：冰糖多、梅汁稠，味濃而釅，甜酸適度，吃一口冰冰涼涼……至於阿拉上海，也有鄭福齋個桂花酸梅湯。老底子，大世界旁邊個鄭福齋門前總有勿少人立辣海，花一角洋鈿吃一碗又甜又酸、帶桂花香氣個酸梅湯，搿也是從前上海灘熱天裡個一道風景線。
後來免費個冷飲水嘸沒了，再後來大家儕吃可樂搭仔雪碧了，再後來，又重新有瓶裝酸梅湯賣了。真是風水輪流轉。
其實，酸梅湯自家做做也便當煞嗰。到中藥房去買點烏梅、甘草、陳皮、山楂，考究點嗰，也可以再加點桑葚、洛神花、薄荷葉、桂花老啥，先擺適量水，浸泡一兩個鐘頭以後，用大火燒開，小火篤一個鐘頭，最後擺冰糖，篤到冰糖烊脫。等冷透以後，拿湯水潷出來，擺辣冰箱裡冰一冰。
從大太陽下頭回到屋裡，吃一口冰鎮酸梅湯，味道勿要忒好，感覺一記頭就清涼下來了。