娛樂偵訊
預告片冇影 JJ冇癮
拒撐《末代御醫》
楊怡離巢「遺作」《末代御醫》，由入雪櫃到放生播出，兩個人妻女主角楊怡及 JJ（賈曉晨）都近乎冇影。楊怡英國完婚回港後，為交代唔續約才現身宣傳一次咁大把；至於第二女主角 JJ，有指因不滿在《末代》預告片被消失，排位遭打壓，於是還以顏色，宣傳活動決定真•消失。
三分鐘片冇影
楊怡去意已決，由她孭飛的新劇《末代御醫》，原安排了三輪宣傳攻勢，她亦只敷衍現身一次。劇中第二女主角 JJ賈曉晨，更加影都冇。
上月底，《末代》在網上放出預告片，但長達三分鐘的片段，連配角樊奕敏都過鏡幾次，反而戲份僅次於楊怡的 JJ，竟然一個鏡頭都冇。
預告片被消失， JJ在《末代》其中一款宣傳海報，亦由阿二降為阿三，頭像比只有配角戲份、飾演「珍妃」的朱晨麗還要細。
非大臺親生女的 JJ不獲尊重，既然發圍基地早已轉到內地，面對大臺冷待，氣難下的她，索性期都唔度，完全缺席宣傳。
去年巡禮去年節目巡禮，《末》劇海報女主角只有楊怡同 JJ，配角朱晨麗冇份。
上月海報到《末》劇出街的宣傳海報，明明係第二女主角的 JJ排位比配角朱晨麗還要細，阿二變阿三。
拍住老公樊少皇在內地搵食的她，內地劇《蜀山》（左）及動漫電影《黑白無雙》（右）均是老公擔任武指兼演出的作品。
海報降呢變配角
「上年節目巡禮介紹呢套劇嗰陣， JJ明明係第二女主角，朱晨麗亦冇份出現喺節目巡禮嘅海報。點知上月底出街，宣傳焦點就落曬喺佢身上。朱晨麗戲份根本冇 JJ咁多，好明顯大臺唔想益外人，所以專登營造到朱晨麗係第二女主角。無端端俾人『燉』， JJ當然好冇癮，所以三月尾兩次活動，同今個月初嗰陣宣傳，一律唔返嚟。雖然佢真係喺橫店開緊劇，但有心返嚟宣傳的話，點都可以度到期！」知情者說。
雖然有內地劇在身，但 JJ上月底仍抽空撐老公為品牌「萬希泉」設計的陀飛輪手錶發布會。
新婚的楊怡最後決定不跟大臺續約，所以《末》劇宣傳，近日都懶得做。
在內地吃得開的 JJ，上月偕夫出席吳奇隆與劉詩詩的峇裡婚宴。
拍住老公搵銀
大臺當草，轉返內地發展的 JJ基本上劇接劇，加上老公樊少皇在內地又拍劇又做武指，好搵到！兩公婆早前拍住上，合演《蜀山戰紀之劍俠傳奇》外，最近又孖住現身「力王」為品牌「萬希泉」設計的陀飛輪手錶發布會。強國水長飲長有， JJ根本唔使揸頸就命，睇大臺面色。
24/3個劇首次宣傳，楊怡身在英國，戲份同樣重的 JJ亦冇現身。
28/3為交代唔續約及秘婚一事，英國完婚的楊怡出席《末》劇第二個活動，而 JJ繼續唔到。
近日在橫店開工的她，亦有時間享受下午茶，歎個甜品。
監製張乾文
做硬炮灰
《末代御醫》可算多事之劇，去年在大臺節目巡禮被安排重點推介，之後高層換位，有指出任助理總經理的杜之克，推行「優化劇集」政策，將《末代》抽起，連此劇的監製張乾文亦被退休。
至於女主角楊怡，被指開出天價續約條件又唔願簽長約，同公司膠著。搬出《末代》迎戰 ViuTV開臺韓國神劇《太陽的後裔》，擺明做炮灰。
可以點原文看更多猛料，也可以畀臺叔一顆充滿愛的贊~