當粵語成為00後眼中嘅火星文......

侄仔（四年級）嘅粵語近排進步好大，大哥大嫂喺屋企終於唔使再講「半桶水普通話」，開心到中咗獎咁，仲要我「評估」下，侄仔仲算唔算「土生撈仔」！

懷住玩嘅心態，我同侄仔玩咗一個粵語俗語問答遊戲，我問一個，佢答一個，贏咗有獎。但系侄仔嘅表現，真系搞我「十五十六」。

✎十五十六：心裡忐忑不安。

我：「你知唔知「冬前臘鴨」咩意思？」

侄仔：「冬天要蒸臘鴨食！」

我：「唔啱。」

侄仔：「啲鴨過冬之前特別肥，整臘鴨最好食？」

我：「你都識得好多嘢喔！」

✎冬前臘鴨——只攋只：一般只兩個性格或外形有差異的人走到一起，尤其指夫妻，暗喻有互補的意思，即一個強「攋」一個弱。

我：「考你第二個，「菠蘿雞」你又識唔識？」

侄仔：「菠蘿蒸雞？」

我：「唔啱。」

侄仔：「菠蘿包裡面包住只雞？」

我：「唔啱。」

侄仔：「只雞包住個菠蘿包？」

我：「唔關菠蘿包事嘎！」

✎菠蘿雞：靠黐，佔人便宜的意思。

我：「再考一個，「你有牛白腩，我有荔枝柴」咩意思？」

侄仔：「一個燒火，一個煮，一齊食牛雜！」

我：「唔好成日諗住食喇。」

侄仔：「牛白腩換荔枝柴，蝕底喔！」

✎你有牛白腩，我有荔枝柴：實力相當，能夠互相抵擋。

我：「考個簡單啲嘅，「生鬼」點解啊？」

侄仔：「一個女人生咗只鬼？」

我：「你鬼片睇得多啊？」

侄仔：「老婆勾佬，搵咗個外國人，咁咪生『鬼（鬼佬：外國人）』咯。」

我：「呢啲情節你喺邊度睇到嘎？以後唔準睇！」

✎生鬼：生動鬼馬。

我：「「拋浪頭」你有冇聽過啊？」

侄仔：「《正義聯盟》個海王啊？一個浪拋過去。」

我：「唔啱。」

侄仔：「系咪Gel頭？Gel到好似周柏豪咁咯。」

我：「咁講有好似講得通喔。」

✎拋浪頭：虛張聲勢，靠嚇。

我：「你想像力咁豐富，再估下「託水龍」系咩意思。」

侄仔：「水龍？哦，我知喇。」

我：「系咩啊？」

侄仔：「系咪屙尿啊？只手託住條X。」

我：「噓！噓！畀你阿媽聽到，佢鬧死我啊！呢題跳過。」

✎託水龍：借了別人的錢，能拖就拖。

我：「「踎墩」好簡單，你估下咩意思。」

侄仔：「咪踎喺個橋墩下面咯。」

我：「好近喇！踎喺度即系點？」

侄仔：「開大。」

我：「除咗食，就系屎尿屁，你喺學校究竟學咗啲乜啊？」

✎踎墩：無所事事，沒事做。也指失業沒有工作，或退休。

我：「正正經經喇，「扎炮」系咩意思？你答啱咗買個雪糕畀你食」

侄仔：「畀少少提示得唔得啊？」

我：「唔系嘢食，唔系屎尿屁，系形容一個人處於艱苦嘅狀態。」

侄仔：「生唔到仔？不孕不育？結紮咗？」

我：「呢啲嘢你喺邊度學返嚟嘎？」

✎扎炮：冇飯開，捱餓。

以上內容雖然含有惡搞成分，但眼看身邊嘅小朋友，對粵語俗語理解同使用嘅能力越嚟越差，真系笑唔出。

粵語裡邊，咁多趣致搞怪俗語，不僅包含住廣東人嘅風俗習慣，亦都記載咗廣東人嘅生活。曾經嘅口頭禪都系一段「歷史」，歷史雖然過去，但希望遺留落嚟嘅嘢唔會銷聲匿跡。

本文粵語俗語及解釋出自《老餅潮語3（蘇萬興）》

如果文中有錯漏之處，請指出更正。

↓如果你得閒冇嘢做，不如點下呢度！