老廣話事·粵語新聞:龍舟水,因住水浸街

　　新快報訊（記者　任磊斌）星期日落咗成日雨，行街、食飯、睇戲都好唔方便。不過，記者喺道仲要提醒下各位市民，龍舟水一嚟，場場都大雨，出街嗰陣，至好避開容易水浸嘅地段。

　　前晚11點幾，記者喺崗頂落班，啱啱（剛剛）遇正（碰上）掛紅色暴雨警告。

哇！崗頂好又多對出嗰個公交車站又變成大水塘。啲積水最深嗰時有40釐米深，車都埋唔到站，好多人根本上唔到車。呢嗰情況一路到禽日凌晨都無改善。稍後，記者仲了解到，起緊（建築當中）嘅白雲國際會議中心（即係以前嘅東方樂園呢）前面嘅立交底，半夜都浸到成米深。

　　記者採訪咗市政部門，佢哋話，啲市政管道養護所應急隊員已經周街咁撲（到處救急）。白雲國際會議中心嗰邊，因為施工對排水管道有影響，市政人員用咗6臺大水泵抽到天光，先將積水搞掂。至於崗頂地帶，佢哋話，舊年底已經改善咗嗰道嘅排水設施，但係短時間內雨勢太大，加上獵德湧水漲，水位仲高過路面，啲水排唔出去。同樣道理，成日水浸嘅中山一立交，都係因為沙河湧水漲倒灌入嚟所致。

　　大雨時節啱啱先開始咋，水浸街嘅場面可能會經常出現，所以市民出門前要唸好（想好）路線先出門口，儘量避開水浸黑點，比如話中山一立交底啦、天河路崗頂段啦、沿江西路同濱江東啦、康王路隧道啦、中山二執信路口同埋童心路環市路口呢啲地方，可以唔去就唔好去喇。