現在假使撥人家叫一聲老克勒，交關人儕會蠻得意，覺得自家檔次蠻高，實際浪並勿是搿樣子，主要是對老克勒個涵義勿清楚。記得有一位資深報人，懂得京昆評彈，又深諳各種文化娛樂，就稱他為老克勒，老先生大不以為然，認為看輕伊了。
「老克勒」到底是啥涵義，一般人不甚了了。有人講看上去有點修養，衣著時尚，又懂點文藝，會白相，都冠以老克勒，尊重裡似乎又有點嘲諷。
記得一次參加海派文化研究中心個年會，會議間歇閒聊時，一個中年作家講，老克勒解放前就有迭種叫法了，而且帶點貶義，伊舉例講一個人乘三輪車少付銅鈿，就被斥為：迭個人是「老克勒」，當時居然有人附和。
其實「老克勒」迭個稱呼是解放後才有個，跟解放前個「小開」「白相人」是兩碼事。筆者算是老上海，經歷過老克勒風行一時個光景，也曾被一些單同事戲稱老克勒，當時心裡向交關勿爽。
屋裡向有本1999年版個《上海掌故詞典》，裡向就有「老克勒」一詞，注釋是：一般指精於社會各種道行和文體娛樂活動的人。不過，筆者對其中個「精於」兩字持異議，認為僅僅是「懂一點」而已。「老克勒」一詞曾流行於上世紀六十年代初到七十年代初，眼下有時還能聽到。
「老克勒」中「老」是前綴詞，就像老王老張一樣。「克勒」開始又叫「克拉斯」，是英語CLASS個音譯，表示某種級別。CLASS在英語中又解釋為上層社會階級，因而對家庭條件比較優渥，穿著打扮比較光鮮時髦，講究生活質量和品位，或者善於社會交際個中老年男子，就會稱他「老克勒」。當然也有人自稱「老克勒」，有人冒充「老克勒」。
後來「老克勒」又演變為「老懂經」「老狄克」等等，意思差勿多。所謂「懂經」，也只是指白相經，知識層面勿高。難怪本文開頭講個老先生對別人叫伊「老克勒」反感。
總之「老克勒」勿是產生在解放前，勿帶有明顯貶義，但也勿算是尊稱。時下有個文化沙龍論壇叫「克勒門」，是高層次高品位個文學藝術之門，門裡向儕是受公眾歡迎、有成就個作家、畫家、音樂家和表演藝術家，但伊拉儕是有真本事個，絕勿是「老克勒」。