藝人韋家雄今日與「銀行之花」老婆鄧楚雅（Keynes）拉埋天窗，兩人晚上假酒店筵開廿八席宴親朋。一對新人換上禮服會見傳媒，Keynes身穿白色低胸婚紗，家雄則穿上全套粉藍色禮服，兩人切結婚蛋糕後合巹交杯，並全程化身接吻魚，場面溫馨。家雄說：「今晚個主題系幸福快樂、開開心心。會場個布置系太太揀，佢鍾意樸素嘅顏色，所以我都要著粉藍色。」Keynes大讚老公好看。家雄稱今晚沒有特別儀式，他們會上臺講幾句簡單說話：「大家開心嚟見證我哋，開開心心食餐飯。（你飲唔飲得？）我可以飲好多，但會醉，反而幾個兄弟好飲得，大家隊佢哋啦！」問到Keynes會否擔心老公今晚飲醉？她笑言：「唔驚，我幫佢頂。」家雄即大讚對方冇得頂。
提到上午接新娘時，家雄自言氣氛開心，沒有喊，但反被太太踢爆：「佢有，佢接我時眼溼溼。我都有眼泛淚光，好感動。」他們透露完成婚禮後隨即飛往泰國度蜜月及跟新娘子在當地的親友食飯慶祝。
問到婚後會否積極造人？Keynes自言兩人都喜歡小朋友，家雄坦言順其自然，會先享受二人世界：「唔想咁快搞到太太脹卜卜，有計劃生小朋友，但未開始。」問到最欣賞對方甚麼？家雄笑言：「靚，我好著重外表。太太都系鍾意我靚，盡在不言中。」Keynes即笑老公浮誇，又指今朝給對方110分，現在要給他119分，分數不斷飆升。