Mercedes-AMG 首部馬力過千匹，最大馬力輸出達1100匹（Overboost狀態達1150匹）嘅Hypercar——Project One正式喺法蘭克福車展（IAA）面世。
Project One總產量275部，車價227萬歐元，香港地區售價約為2500萬港元。
香港獲分配額8部，有消息指8部配額已售罄。MenClub為此向Mercedes-Benz Hong Kong查詢，8個配額雖已「名花有主」，但買家喺現階段仍可改變主意，因此仲有waiting list，換言之，想買嘅話，仲有機會。
綜合多位歐洲行家消息，IAA公布嘅Project One實物，距離投產版本仲有少少距離，相信廠方會喺2019年第二季付運首批Project One前，再細微改動車身外形。
Project One配4個摩打，四輪驅動。
兩個驅動前輪，馬力合共327匹；一個107匹驅動渦輪增壓器（Turbo），另有一個160匹，直接與後方驅動軸整合，其結構與性質同目前F1賽車嘅MGU-K（Motor Generator Unit-Kinetic）相似。Project One有一組鋰離子電池位於底盤以下，因此可以「純電動模式」行車約24km，呢個狀態下嘅Project One只靠前面兩個車輪帶動。
Project One嘅1.6公升V6 Turbo引擎，源自平治W08型F1賽車，最大馬力達612匹，紅區為11000rpm，「萬一轉」嘅平治街車，絕對系話題之作。由於引擎屬高轉型高增壓力設計，每累計行駛約30000英哩（即約48,300km），便需要維修引擎，相對F1賽車，鬥完一場就拆散曬引擎，Project One一啲都唔過份。
Project One配由Xtrac發展，液壓力推動嘅8前速自動離合器波箱，廠方指0至200km/h加速時間為6秒，極速350km/h，唯未有提及0至100km/h加速時間及總重。
有英國傳媒估計Project One嘅車重約為1000kg（當中引擎、波箱、摩打約重520kg），喺上述動力系統配合下，0至100km/h加速可於3秒內完成。
咁勁嘅Benz降世，平治主席Dieter Zetsche（官方中文譯名蔡澈）都忍唔住咁感性喺揭幕新車時表示，佢喺過去40年，都冇見過一款咁能引起公眾狂熱嘅平治新車，Project One令所有平治同AMG嘅高性能型號都變得緲小。佢話Project One雛型喺去屆巴黎車展亮相後翌日，廠方已收到來電錶示有意購入。
呢期平治喺高性能、超跑，以至Hypercar領域都不斷出手，車迷系時候入市喇。