作者：樹林
改編、推薦：丁迪蒙
朗讀：安娜
圖片來自網絡
[由於公眾號平臺讚賞功能規則有變化，如想打賞，可長按打賞碼（頁面下方倒數第2個二維碼），多謝朋友們對「麥唐作」的支持！]
我有個毛病，就是忘記勿脫過去。今朝，我又想起了搿個故事。
伊個一年，我搭田秀從黑龍江回上海結婚，迭個婚禮，阿拉共同籌備了足足有得五年。五年以來，日出而作、日落也作個插隊落戶生活，讓阿拉經歷了一次又一次吃力得坍倒、生病個生命危機，竟然儕「勿治而愈」，硬勁挺過來了，原因就是阿拉有個秘密一直勒海支撐：存夠鈔票回上海結婚！
終於，阿拉兩家頭帶勒五年個積蓄回到了上海，婚禮安排勒禮拜六夜裡向進行。
禮拜六夜裡，爸爸姆媽風塵僕僕、從遠郊個「五七幹校」回到了屋裡向。田秀個父母親長年關押勒「觸靈魂學習班」裡接受批判，夠趟，也破天荒個請準了一天個假，雙雙一道來了。真箇是邪氣美好個禮拜六，一個讓人激動、歡樂到要落眼淚個夜到。
當天夜裡個九點鐘，兩家人家個長輩、一對新人，拿捲起來個衣裳袖子管放下來，團團入坐，開始享受百分百個自力更生個婚宴。臺子浪向，田秀一邊勿停個往兩家父母個碗裡向搛菜，一邊介紹：「黃豆呢，是隊裡向種個，雞呢，是問老鄉屋裡向買個，黑木耳，是阿拉自家儲存下來個。」我，勿斷個去拿臺子浪個酒杯倒滿，「幸福、團聚」了！心裡向是邪氣個喜悅呀！五年個分離，五年個期待，今朝夜到終於撥了阿拉一次性個補償了。但是，雙方父母儕老少動筷子，勒伊拉欣慰個面孔浪時勿時有絲絲苦澀閃過。我個姆媽眼睛裡向帶勒眼眼淚，講：」一切儕是㑚自家勒忙，做父母個倒嘸沒能夠盡點力，心裡向蠻難過個。」「姆媽」，田秀輕輕叫個叫了一聲，婚宴浪向一時無言。我立起來，田秀跟勒也立起來了，阿拉舉好酒杯，講：「敬爸爸媽媽，祝父母親大人身體健康！」大家一道舉起了酒杯，六杯酒碰勒一道，響勒一道，為兒女個新婚，為全家人個未來希望，乾杯！
新婚生活，相親相愛個日腳，阿拉是心滿意足呀！
上海」紅房子「西餐館邪氣有名個，勒黑龍江寒冷個夜裡向，我搭田秀勿曉得多少次聊起伊了。學生時代，每日天讀書要經過伊面個。「紅房子」色彩豔麗個裝潢，餐桌浪銀顏色個刀叉，雪白個餐巾，儕是阿拉兩家頭談勿光個。還有，餐館裡向傳出來個免費個香味道，更加是常莊撥阿拉從記憶裡向翻出來，作為阿拉滿嘴巴個洋山芋搭北方風雪個調味品。蜜月裡向，阿拉兩家頭昂首走進「紅房子」，想要滿足多年個願望：吃一次西餐。
坐勒舒適軟綿綿個座位浪，我指牢餐牌講：「儂看看看，想吃點啥？」嗯、嗯，吃啥呢？田秀笑咪咪個捧起餐牌讀。讀好印刷精美個餐牌，阿拉冷靜下來了。輕輕叫商量了一歇，邪氣小心個點了份牛排——要曉得，每趟講起牛排，田秀個眼睛是哪能介個放光！又點了一客羅宋湯。點好以後，服務員面孔側了海問：「還要啥伐？」哦，夠了，夠了。覅了。田秀急急忙忙個回答。坐勒旁邊個我眼睛低下來了，夠了？迭個就是阿拉等待了多少年，準備大吃一頓個西餐？田秀倒是邪氣有興致，伊一直勒勒笑。牛排端上來了，伊老認真、老仔細個用刀、叉拿一份牛排切割成功勿少個小塊，講：「阿拉有交關塊牛排了。」伊叉起一塊朝我個嘴巴裡向送，邪氣溫柔個講：「來，阿拉一塊、一塊個吃」，我笑了。
兩副飢餓個腸子、兩隻邪氣空廣個胃，邪氣乾淨、一眼也勿浪漫個接受、收藏了搿一份西餐，田秀講：「勿好急個，阿拉要慢慢叫個消化伊拉。」我提議再要杯咖啡來，我講：勿好叫服務員笑話阿拉，哪能有得吃西餐勿吃咖啡個？」「真箇啊？」「當然咾！」於是，又要來了一杯咖啡，兩隻嘴巴津津有味個、輪流個拿伊喝光了。勿算奢侈，倒也算是夠豪華個晚餐，讓我搭田秀沉浸勒勒驕傲搭仔愉悅當中。
阿拉是哪能介挺好仔胸走出「紅房子」個啊，田秀居然勒眾人面前苟牢仔我個臂把走，哈哈！搿是第一次哎！搿個難道勿是因為牛排個力量？勿是因為羅宋湯個動力？勿是咖啡個魅力嗎？阿拉邪氣開心個迴轉去了，走遠了，回過頭，再去望一眼「紅房子」，勿再遺憾個投過去永訣個目光。
蜜月一閃就過去了，迴轉去個日腳到了，阿拉勿好坐吃山空個。
夜闌燈下，田秀勒勒整理阿拉個行李，我呢，開始結算生下來個銀兩。乃末苦了！我個額角頭浪汗也嚇出來了！豪掃拿衣裳個袋袋一隻只個兜底翻，結果是哪能尋也尋勿出一塊洋鈿了，我簡直是絕望了，阿拉樂極生悲啊！啥人讓阿拉嘴巴介饞，要去貪吃一份牛排？啥人讓阿拉有好奇心，去多吃了一盆羅宋湯？又是啥人讓阿拉死要面子，去多要了一杯咖啡呢？現在，剩下來個鈔票只夠買一張到黑龍江去個火車票了。但是，阿拉是兩個人，是一對剛剛結婚個夫妻呀！從黑龍江回上海阿拉整整籌備了五個年頭，現在要重新回到黑龍江去，阿拉是碰到了嘸沒辦法逾越個鴻溝！到啥地方去尋鈔票呢？我搭田秀是一夜無眠。
第二天一清早，我出去買了一張到黑龍江去個車票，下半天拿田秀送上了火車。火車慢慢叫開了，田秀個眼睛一直看牢我，邪氣勿安，我跟牢仔火車跑了幾步，叮囑田秀：「記牢，一到黑龍江就馬上寫信回來！」
田秀一直勒勒點頭。目送火車慢慢叫開遠，我想，田秀個信可以及時寄回來伐？上海到黑龍江去個火車票有效期限是十二天，實際個旅程是四日天，田秀假使一到黑龍江就馬上拿車票寄回來，葛末一來一回是八天，還剩下來四日天個有效期，剛好夠我返回黑龍江。
七天過去了，第八天我收到了信，車票呢，又回到了我個手浪向，一切儕按照計劃勒勒進行。車票浪向只有進上海站個記號，嘸沒留下來出黑龍江站個痕跡，田秀按照我個計劃從壞脫個鐵絲網鑽到外頭去了。
立時三刻，我扛起了自家個行李，到火車站去買張了到蘇州個票子。一到蘇州我又立刻到窗囗去辦理中轉手續了。「籤今朝夜裡向xx次去黑龍江，」我拿車票遞過去。辦理籤證個姑娘剛剛要拿票據貼上去，突然介問我：「儂啥辰光到蘇州個？」「前幾天呀」「為啥今朝再來中轉？」「今朝走，當然今朝再來籤票咾。」「哪能蹲勒蘇州介許多辰光呢？」「關儂啥個事體啊？」我有點心虛，火了。沒想到籤證個姑娘走出來講：「走，跟我跑一趟。」「到啥地方去？」「革委會。」「到伊面去做啥？我勿去！」我個話音還沒落下來，籤證姑娘就一隻手拿我個行李拎起來，直接走了。我「哎哎、哎哎」個叫，只好跟了伊過去了。
「主任」，一走進辦公室，籤證姑娘就哇啦哇啦個講了：「搿個旅客有問題。」
就像一生出來就已經開始坐勒勒搿張辦公檯子，永遠是一付勒勒深深思考當中個主任聽到聲音就睜開眼睛，聽了籤證姑娘個一陣交代以後，主任拿伊個目光移到了我個身浪。我有眼勿安，也蠻緊張個。我邪氣擔心主任到我身浪向來搜，因為我個褲袋袋裡有一張剛剛從上海到蘇州個車票。假使撥伊搜出來，葛末我個謊言將是勿攻自破了。
「你幾號到蘇州，為啥今朝再離開？」主任問。
「我…我生毛病了。」
「啥個毛病？」
「我感冒了，發寒熱了。」
「去看過醫生伐？」
「嘸沒，小毛小病從來勿看醫生個。」
「現在毛病好了伐？」
「好了」！
「葛好個，」主任立起來走到我個身邊，「儂阿好講撥我聽，到蘇州以後儂住勒啥地方？」
「我……住勒阿里……我住勒阿里關儂啥事體啦？」主任搿一個棍子拿我打悶脫了，我勿曉得哪能回答伊。
「住勒阿里？」主任毫勿放鬆。我張了張嘴巴，還是發勿出聲音。
哈哈哈，主任笑起來了，伊又重新坐到伊個位子浪，交關辰光，像是勒勒自言自語，又像是勒搭我講：「搿樁事體哪能辦好呢，年輕人啊，搿種辦法老早就有人用過唻，儂哪能勿想個新個花樣呢？」
實在是沮喪啊，我低頭立勒海。心裡向想，別人家也用過搿個辦法個？伊拉也勿成功？我拍仔腦袋整整想了一夜天，倒是步了人家個後塵？
「主任！」突然之間，我用老老大個聲音叫了一聲，主任抬頭朝我看。我講：「我住勒觀前街後梗子巷xx號。」我脫囗而出，想起來了，田秀個好婆住勒蘇州個，老太太常莊搭田秀寄包裹，每趟到公社裡去拿包裹個辰光，我是勿止一次個熟讀迭個地址個。
主任個面孔變脫了，伊邪氣生氣個看牢仔我。一直立勒旁邊個籤證姑娘老驚訝個轉過身來朝我望，黑眼珠也要滾出眼眶個樣子。我笑了：「觀前街後梗子巷，我好婆屋裡。」「小劉」，主任揮揮手搭籤證姑娘講「儂跟伊走一趟，查查清爽！」「啥事體？還要查？」我哇啦哇啦叫起來。主任冷冰冰個命令：「行李留下來。」
朝啥地方走？觀前街勒了阿里個方向？我硬仔頭皮走出火車站，小劉呢，伊跟勒我個身後頭。我朝左轉彎，小劉勒後頭講：「向右。」我筆筆直朝前頭走，小劉勒後頭講：「左轉彎過馬路，當心車子」。過了馬路，勒十字路囗前頭，我猶豫勿決了，左面看看，右面看看，希望有張路牌讓我看，但是嘸沒。「喂！」小劉勒後頭開囗講了：「哪能勿走了啦？」
「尋勿著路！」我氣煞了，一屁股坐勒路旁邊個石頭浪向，勿走了。我曉得，我個謊言老裡八早就撥搿個姑娘識破了，走下去已經毫無意義。小劉也勒我身邊坐下來，勿聲物響望耗仔我。過脫仔一歇，我立起來講：「回去，回車站。」「儂坐下來。」小劉搭我講。「儂阿是老吃力啊？」突然之間，一股無名個火勒勒我個心裡向燃燒起來了，我對牢仔眼門前迭個監視我，而且已經識破我個謊言個姑娘大聲叫起來了：「走勿動了伐？是個呀！坐勒辦公室裡向多少適意啊！要跟牢仔一個逃票個插兄勒勒馬路浪向來來回回個辛苦，多少冤枉啊！」我控制勿牢自家個委屈搭仔憤怒，繼續咆哮：「快點起來，前頭帶路！沒儂帶路，我甚至火車站也回勿了！」
「儂先坐下來嘛。」小劉勿火也勿惱，邪氣冷靜個要我坐下來，伊講：「我有問題要問儂。儂是哪能曉得迭個地址個？」我勿回答伊。小劉講：「儂講撥我聽，我就住勒觀前街後梗子巷」「儂…」我呆牢了。「儂勒勒革委會裡講自家住勒搿個地址個辰光，我奇怪煞了。請儂告訴我，儂哪能曉得迭個地址個？」小劉幾乎帶了哀求個囗氣問我。「好婆…田秀個好婆…伊…」我急得閒話也結結巴巴了。「田秀？」小劉勒末生頭一記頭立起來，邪氣興奮個拉牢仔我個手臂把叫起來了：「儂認得田秀個？」
「阿拉勒一道插隊落戶…」我個閒話還沒講光，小劉就拖牢仔我走：「走，到我屋裡去，好婆真箇是想煞田秀姐姐了呀。」
「田秀，姐姐？」 我勿理解。
「啊呀！田秀是我個表阿姐呀，伊到黑龍江去插隊，好婆邪氣擔心伊吃苦、辛苦個，每日天儕了想伊。姐姐來信又總歸講說老好個，好婆勿相信，講插隊哪能會得勿苦個呢？」小劉揮了個手，像煞是終於搭好婆尋到了田秀一樣，一面孔個歡喜。聽啊聽啊，我終於明白了。我講：「儂是小繼妹妹伐？」「咦？儂哪能曉得我個名字個？」 小劉個眼睛睜得老老大。「哦，我還看到過儂搭田秀小辰光拍勒一道個照片。只不過，儂個變化忒大，認勿出來了。」「儂是？」 「我是……哦，回到屋裡再講伐。」我拿頭別過去，面孔悄悄叫個紅了。
……
夜到，從蘇州火車站開往黑龍江個列車啟程了。月臺浪向，好婆一頭個銀髮勒勒風裡向裡飄啊飄，伊朝牢仔朝前滾動個列車勿斷個揮手，嘴巴勒勒動，我聽勿清爽老太太勒勒講點啥，介大個年紀，我實在勿想讓伊來送我，但是伊堅決要來，伊講：「儂假使去讀大學，我勿送；儂到廠裡向去上班，我勿送；你到部隊去參軍，我勿送；你現在是到黑龍江去插隊，我就一定要送個。搭田秀講，勿要忒吃力，弄壞脫身體，我等伊迴轉來。」好婆個閒話我一句一句記勒心裡向。
咦，小繼妹妹呢？哪能勿勒海？月臺浪向介許多人，哪能可以嘸沒繼妹一邊攙扶好好婆呢？我伸出頭，邪氣急個尋。
「姐夫！」小繼妹妹勒勒叫我。伊跟牢仔列車拼命個奔，手裡還託好仔一袋蘋果。我快點揮手，喊伊：「勿要，勿要，撥好婆，撥好婆吃！」「是好婆叫我去買個，快點接牢，好婆看勒海！」 我接牢蘋果，抬起眼睛看好婆，伊仍舊立勒伊面勒揮手，風裡向，銀白色個頭髮勒勒飄動。我舉起蘋果，對牢好婆大聲個叫：「好婆保重，好婆再會！」火車逐漸開遠了，逐漸變小個好婆還立勒月臺浪揮手，伊聽到我個呼叫聲了伐？
我想，老太太一定是聽到個。
朗讀者安娜
阿拉最近還發過：
[申情申音][小說]胭脂扣（十一）
[申情申音]閏土與豆腐西施（節選自短篇小說《故鄉》）
[申情申音]春光明媚，紙鷂放「笨」
[申情申音][小說]胭脂扣（十）
[申情申音]廣福憶舊
[嘉人嘉音][日本留學記連載七]歌舞伎町
[申情申音][小說]胭脂扣（九）
[嘉人嘉音][古文]蘭亭集序
[申情申音][小說]胭脂扣（八）
[嘉人嘉音][古詩]村居
[申情申音][小說]胭脂扣（七）
【麥唐作】即「麥小姐」和「唐廠長」的作品，是以滬語（語音口音偏上海市區音；文本表達參照錢乃榮《上海話大詞典》及《上海話小詞典》）為主打的原創方言專欄。文體、形式自由不羈，力求「做得開心，聽得滿意」。
「麥唐作」又取「賣糖粥」之諧音，願為眾友獻上一份帶著生活回甘的「地氣美食」。
【申情申音】本欄目以滬語朗讀為主打，文字來源可原創，也可選取其他老師的優秀文章進行適度改編（儘量取得原作者的授意，如暫未能及時聯絡得上，也將尊重其原文著作）。
申音悠悠，好文共賞。
本公眾號發布內容（包括音頻及未註明「來源」的文字、圖片）皆為原創，作者保留對作品的著作權。未經授權允許，不得擅自轉載。
非常感謝何東先生和何予西同學、陶嵩飛同學，為「麥唐作」公眾號製作、演唱片尾曲。
如有需要轉載或其他工作邀約：
可添加微信號：Leslie_0207
或郵件：leslie_0207@163.com
多謝您的支持和歡喜！